Familjarët e viktimës si dhe të autorit të vrasjes së dyfishtë që ndodhi në Ballsh, ku Gazmend Musta masakroi me thikë gruan dhe motrën e saj, kërkojnë kujdestarinë për dy fëmijët e mitur.
Në seancën e sotme përgatitore, me qëllim sqarimin e rrethanave të kujdestarisë ishte i pranishëm edhe babai i fëmijëve dhe autori i dyshuar i vrasjes së nënës së tyre Gentianca Caushi dhe motrës së saj Merisa Caushi.
Dajoja i fëmijëve Gjyshmir Caushaj, me një kërkesë drejtuar Gjykatës së Fierit në datë 17 Janar 2019, ka kërkuar kujdestarinë e mbesës dhe nipit të tij. Po të njëjtën gjë, disa ditë me vonë, kanë bërë edhe gjyshërit e dy fëmijëve, Bedri dhe Lumturi Musta, prindërit e Gazmend Musta. Gjyqtare e çështjes është Arta Duka.
Aktualisht fëmijët 3 dhe 10 vjeç ndodhen në fshatin Sos, që pas ngjarjes së rëndë së dy janarit në Ballsh.
Të dyja palët janë paraqitur në gjykatën e Fierit, shoqëruar edhe nga familjarë të tjerë. Edhe pse kanë shkëmbyer vështrime, asnjë fjalë nuk është thënë mes tyre.
Procesi do vijojë me dyer të mbyllura, ndërsa do të vijohet me pyetjen e fëmijëve dhe palëve. Gjyqtare e çështjes ishte Arta Duka dhe seanca është shtyrë për në datë 25 shkurt.
