Familjarët e Skerdilajd Konomit, gjyqtarit të vrarë më 9 shtator 2011 në Vlorë, i kërkojnë institucioneve të drejtësisë rihapjen e menjëhershme të hetimeve dhe transparencë të plotë për zbardhjen e krimit. Apeli vjen për të 14-in vit radhazi, pas mosgjetjes së autorëve të atentatit me telekomandë në të cilin Konomi u vra në moshën 33 vjeç.
Sipas familjes, pas vendimit të SPAK për moskompetencë dhe kalimin e çështjes te prokuroria lokale, e cila ia delegoi dosjen Prokurorisë së Fierit, edhe kjo e fundit e ka pezulluar hetimin. Familja kërkon rikthimin e çështjes për hetim nga SPAK dhe përfshirjen e ekspertizës ndërkombëtare për një proces të paanshëm.
Në një e-mail dërguar SPAK-ut, institucioneve të drejtësisë dhe Top Channel, familja shpreh shqetësimin për vrasjen e pazbardhur, duke e cilësuar si një akt kriminal që godet jo vetëm një individ, por edhe sistemin e drejtësisë. Ata theksojnë se kujtimi i gjyqtarit Konomi nuk mund të mbetet thjesht një përvjetor i radhës dhe se ndërtimi i një drejtësie të re nuk është i mundur nëse krimet ndaj përfaqësuesve të saj mbeten pa autor.
“Institucioni i SPAK-ut është ngritur me qëllimin për të hetuar pikërisht raste ku krimi, korrupsioni, përfitimi i padrejtë dhe ndikimi mbi drejtësinë kanë bashkëjetuar në dëm të qytetarëve dhe shoqërisë. Nëse SPAK nuk merret me çështje si kjo, atëherë përse ekziston? Kërkojmë nga SPAK, si institucioni kryesor në luftën kundër krimit të organizuar, që ta rikthejë këtë dosje në prioritet të tij. Po ashtu, i bëjmë thirrje Prokurorisë së Përgjithshme, Policisë, KLP dhe KLGJ që të bashkëpunojnë ngushtë për një hetim të thelluar”.
Familja deklaron se apeli vjen pas një periudhe të gjatë pritjeje dhe pasigurie: “Sot pas 14 vjetësh pritjeje, frikë dhe heshtje, ne si familjarë kemi vetëm një pyetje për ju. A do të guxojë ndonjëherë drejtësia shqiptare të përballet me të vërtetën, sado e hidhur apo e rrezikshme të jetë ajo?”.
Duke e cilësuar atentatin si të planifikuar, familja shprehet se heshtja institucionale ka qenë po aq tronditëse dhe e pashpjegueshme. Ata nënvizojnë se Skerdilajd Konomi nuk ka qenë i përfshirë në çështje korruptive: “Ai u vra sepse kishte guximin të kërkonte të drejtën e tij, pronat e trashëguara familjare, të cilat i fitoi përmes një procesi të rregullt gjyqësor”.
Në përfundim, familja bën apel për mbrojtjen e gjyqtarëve dhe prokurorëve që ushtrojnë detyrën me ndershmëri dhe kërkon që dosja të trajtohet me prioritet të lartë institucional.
