Fakte të reja kanë dalë në dritë nga vrasja e 20-vjeçares britanike në Greqi, nga disa grabitës. Së fundmi janë siguruar kamerat e sigurisë në zonë të cilat tregojnë lëvizjen e një makine dhe një motoçiklete që e ndiqte atë nga pas në orën 5 të mëngjesit, pak minuta pas ngjarjes që i mori jetën të resë.
Materiali është marrë nga kamerat CCTV nga një shtëpi në rrugën Karaiskaki, afër shtëpisë së çiftit. Makina e errët kalon në 05:07 të mëngjesit të së martës 11 maj dhe katër minuta më vonë, në 05:11, ndjek motorin, në të cilin ndodhet një person i cili duket se ka veshur një xhup me kapuç.
Ishte ora 5.30 e mëngjesit kur persona të panjohur hynë në shtëpinë e çiftit dhe vranë 20-vjeçaren në sy të vajzës 11 muajshe dhe bashkëshortit ndërsa vodhën 10 mijë euro dhe bizhuteri që kishin në shtëpi.
Krimi i rëndë ndodhi në njërën prej lagjeve qendrore e më të pasura të Athinës, por sërish askush nuk di asgjë, ndërsa grabitësit nuk lënë pas asnjë gjurmë.
Hetimet kanë marrë një tjetër kthesë, të paktën këtë pretendojnë disa raporte në shtypin vendas, sipas të cilave një mister rrethon bashkëshortin e viktimës, Charalambos Anagnostopoulos. Lëvizjet e dyshimta të autorëve tani po thuhet se mund të kenë qenë pasojë e ndihmës nga një person i njohur i familjes.
Pozitat e tij i rëndojnë dhe fjalët që kanë qarkulluar së fundi se Caroline kishte siguruar jetën e saj për 1 milionë euro, shkruajnë mediat greke. Por këto skenare e kanë bezdisur së tepërmi 32 vjeçarin, siç tha avokati Stavros Balaskas për ANT1. Policia greke thotë sakaq se kabulli i përdorur për të lidhur pilotin gjatë grabitjes ku humbi jetën e shoqja, është marrë nga magazina e banesës dhe autorët nuk e kanë pasur atë me vete.
