Një ngjarje e rëndë kriminale ka tronditur qytetin e Vlorës më 27 prill 2025, ku Renato Hoxha, 58 vjeç, u ekzekutua në orët e para të mëngjesit pranë poliklinikës së qytetit. Ai u qëllua me katër plumba në trup dhe kokë, duke humbur jetën në vend.
Pas një hetimi të thelluar, Policia e Vlorës, në bashkëpunim me Forcat Operacionale dhe Prokurorinë, finalizoi operacionin e koduar “Në Gjurmë” më 1 gusht, i cili çoi në arrestimin e Kleanth Bylykut, i njohur dhe me emrin Armando Gega.
Ai dyshohet si një nga bashkëpunëtorët kryesorë të vrasjes dhe u kap teksa lëvizte me një automjet tip Audi në qytet. Bylyku është një emër i njohur për policinë, i dënuar më parë për armëmbajtje pa leje. Ndaj tij, Gjykata e Vlorës ka caktuar masën e sigurisë “arrest me burg”.
Hetimet kanë zbuluar se vrasja e Hoxhajt dyshohet të jetë porositur nga Dubai, ndërsa një shtetas rumun, 53 vjeç, me precedent penal dhe i identifikuar si Daniel Cornea, është shpallur në kërkim ndërkombëtar si bashkëpunëtor.
Sipas të dhënave, Cornea, i dyshuar si vrasës me pagesë, është larguar menjëherë pas krimit drejt Greqisë. Ai është kapur nga kamerat e sigurisë me një veshje të pazakontë, e përdorur si maskim për të shmangur identifikimin.
Gjithashtu, më 30 prill është arrestuar edhe një tjetër bashkëpunëtor i dyshuar, Eris Mehmetaj, i cili dyshohet se ka siguruar automjetin që është përdorur nga autori ditën e krimit për të lëvizur në qytet.
Sipas autoriteteve, pista kryesore e hetimeve është një konflikt për shkak të “lojës së dyfishtë” që viktima kishte bërë mes grupeve rivale kriminale.
Hetimet për këtë vrasje të rëndë vazhdojnë, ndërsa autoritetet janë në kërkim të bashkëpunëtorëve të tjerë të përfshirë në këtë ngjarje.
