Gjykata e Apelit të Juridiksionit të Përgjithshëm ka dhënë vendimin për Arbër Paplekajn, ish-efektiv i RENEA-s, duke e dënuar me 7 vite burg për vrasjen e mjekut psikiatër Pjerin Xhuvani. Ngjarja ndodhi më 21 prill 2021, vetëm katër ditë para zgjedhjeve parlamentare.
Në vendimin e saj, Gjykata e Apelit arsyetoi se vrasja u krye në kushtet e një gjendjeje të rënduar psikike. Kjo shpjegon uljen e dënimit nga 22 vite, siç kishte vendosur më parë Gjykata e Shkallës së Parë të Elbasanit, në vetëm 7 vite burg.
Dy ish-zëvendësdrejtorët e policisë Elbasan dhe efektivët e tjerë të përfshirë në ngjarje janë cilësuar të pafajshëm nga Gjykata e Apelit.
Arbër Paplekaj vrau me një plumb Pjerin Xhuvanin, i njohur si një eksponent i Partisë Socialiste në Elbasan, gjatë një përplasje me armë midis grupeve mbështetëse të Partisë Socialiste dhe Partisë Demokratike. Ngjarja ndodhi në një kohë të tensionuar politike, vetëm pak ditë para zgjedhjeve parlamentare të 25 prillit 2021.
Paplekaj ishte pjesë e strukturës së Partisë Demokratike për mbrojtjen e votës në shtabin elektoral të Elbasanit. Përplasja erdhi pasi Struktura për Mbrojtjen e Votës ndaloi një automjet të drejtuar nga një përfaqësues socialist, duke dyshuar se brenda makinës ndodheshin materiale zgjedhore dhe shuma parash të destinuara për blerjen e votave.
LEXO EDHE:
Bardhi sqaron ngjarjen në Elbasan: Arbër Papleka nuk është vrasës dhe as shoqëruesi im!
