Policia e Durrësit ka identifikuar dhe shpallur në kërkim dy persona të dyshuar si bashkëpunëtorë në vrasjen e 29-vjeçarit Ermir Dedja, i cili u ekzekutua me armë zjarri më 20 maj në lagjen 18 të qytetit.
Të dyshuarit akuzohen se kanë siguruar logjistikën e nevojshme për atentatin, përfshirë mjetin që u përdor nga autorët për të realizuar vrasjen.
Sipas hetuesve, dy persona të tjerë dyshohen si ekzekutorët e drejtpërdrejtë, ndërsa bashkëpunëtorët krijuan kushtet që atentati të kryhej pa lënë gjurmë.
Automjeti me të cilin u krye vrasja u gjet i djegur shtatë orë pas ngjarjes, në fshatin Gërdec të Tiranës.
Nga mjeti janë rikuperuar prova që po analizohen në laboratorin shkencor dhe pritet të ndihmojnë në zbardhjen e plotë të ngjarjes.
Ermir Dedja ishte një emër i njohur për policinë, me precedentë penalë për trafik droge dhe përfshirje në një plagosje me armë në vitin 2017.
Në 2015 ishte arrestuar për trafik të lëndëve narkotike drejt Kosovës. Sipas burimeve nga grupi hetimor, Dedja kishte lidhje të afërta me grupin kriminal të Shijakut dhe ishte mik i ngushtë i Astrit Avdylajt, i cili është në kërkim ndërkombëtar nga SPAK.
Viktima u qëllua për vdekje në një lokal, ndërsa ndodhej në shoqërinë e dy personave të tjerë.
Një plumb në gjoks i shkaktoi vdekjen e menjëhershme.
Dy pistat kryesore të hetimit lidhen me prishje pazare droge dhe hakmarrje për ngjarje të kaluara kriminale ku Dedja dyshohet se ka qenë i përfshirë.
Policia ka sekuestruar gëzhoja, pamje kamerash sigurie dhe dëshmi të mbledhura në vendngjarje, ndërsa hetimet vijojnë me intensitet për të identifikuar dhe kapur autorët.
