Gjykata e Durrësit ka vendosur që të lërë në masën arrest me burg Habib Rexhën, i cili akuzohet për vrasjen e Arian Gosës në Kavajë. Ndërkohë shoku i tij, Ervis Kurti, i cili u akuzuar se ka ndihmuar 31-vjeçarin që të arratisej me makinë nga vendngjarja, është lënë në ‘arrest shtëpie’.
Si ndodhi ngjarja
Habib Rexha ekzekutoi pasditen e 21 majit me një plumb në kokë 48-vjeçarin Arjan Gosa, i cili ishte duke pirë kafe me babanë e tij në një lokal në Kavajë.
Vlen të theksojmë se shkak i vrasjes është hakmarrja, pasi Habib Rexha është vëllai i Altin Rexhës, i cili mbeti i vrarë në vrasjen e dyfishtë në muajin mars të këtij viti në Kavajë, ku viktimë mbeti edhe Edmond Gosa.
Habib Rexha mori hakun e të vëllait, për një vrasje të dyfishtë në muajin mars që nisi për një konflikt banal. Autori veproi i vetëm, e duket se është përpjekur që shenjën e hakmarrjes t’ia kthejë në të njëjtën mënyrë fisit Gosa. Ashtu sikurse Arjani u ekzekutua në sy të të atit, edhe Altin Rexha kishte pasur të birin përdore kur Edmond Gosa e la të vdekur.
Rexha ka dëshmuar në polici se ditën e ngjarjes ka qenë rastësisht në të njëjtën zonë me Arian Gosën dhe se në makinë ka qenë me një shokun e tij, i cili nuk ka qenë në dijeni të situatës. Rexha ka deklaruar se i ka kërkuar mikut të tij të parkonte pak metra larg lokalit dhe ka shkuar e ka qëlluar me pistoletë Gosën me një plumb në kokë, duke i shkaktuar atij vdekjen e menjëhershme.
“Krimin e kreva pa e menduar, e pashë dhe e vrava”, ka thënë ai. Më pas Rexha rrëfen se i ka kërkuar mikut të tij që të largohen dhe miku i tij e ka lënë diku në dalje të Kavajës. Dyshohet se autori ka qëndruar në Kukës këto 2 ditë.
