Një ngjarje e rëndë është regjistruar këtë të premte në Gjermani, ku dy shqiptarë nga Kosova janë përplasur me armë zjarri.
Njëri prej tyre, i identifikuar si Armin Neziri, 30-vjeç, u qëllua me armë zjarri në një nga kryqëzimet e qytetit gjerman, teksa ndodhej brenda automjetit të tij tip “Porsche Cayenne”, ku si pasojë mbeti i vrarë në vend.
Mediat e huaja dyshojnë se autor i ngjarjes është një tjetër shqiptar nga Kosova, i identifikuar si Rinor Z, i cili drejtonte automjetin tip “Mercedes Benz”. Hetimet vazhdojnë ende, por sipas mediave në ngjarje mund të jenë të përfshirë më shumë se dy persona.
Sipas dëshmitarëve okularë, drejtuesi i “Mercedes Benz-it”, Rinor Z, pas përplasjes është larguar në këmbë, ndërsa ka arritur t’i shpëtojë forcave të policisë.
“Autori i dyshuar i vaisjes është larguar, jemi ende në kërkim të tij”, tha Katrin Söfker, zëdhënëse e zyrës së prokurorit publik në Hanover të Premten.
Mediat gjermane bëjnë me dije se hetuesit dyshojnë se Rinori ndodhet ende në Gjermani, në Hanover apo edhe Langenhagen.
Sakaq, Armin Neziri nuk ishte një emër i panjohur për drejtësinë gjermane.
Emri i tij është lakuar më 22 mars të 2017-ës, për një përplasje me armë zjarri në Andreas-Hermes-Platz, ku mbeti i vdekur një person.
Për këtë vrasje, si autor u dyshua pikërisht Neziri, i cili mbeti i vdekur ditën e sotme. Para kësaj, Neziri ishte plagosur nga disa goditje me thikë.
