Gjykata e Fierit ka shpallur vendimin për vrasjen e 20-vjeçarit Grei Bihuci, ngjarje që ndodhi më 11 mars 2024 në qendër të qytetit. Në seancën e sotme gjyqësore, nën masa të rrepta sigurie, u shpall fajtor autori kryesor Florian Muka, ndërsa u lirua vëllai i tij i mitur, K. Muka.
Seanca u zhvillua në Gjykatën e Shkallës së Parë të Juridiksionit Fier me trup gjykues të përbërë nga kryetari Genci Busho dhe anëtarët Vladimir Cjapi e Elira Hroni. Prokuror i çështjes ishte Petrit Vukaj, ndërsa mbrojtja u përfaqësua nga avokati Ervis Goxhaj.
Prokurori kërkoi 25 vite burg për Florian Mukën dhe 12 vite për të miturin K.M., kushëriri i tij. Sipas mbrojtjes, Floriani e ka pranuar vrasjen, por ka deklaruar se e ka kryer në kushtet e vetëmbrojtjes. Nga ana tjetër, i mituri K.M., 16 vjeç, ka pranuar se ndodhej në vendin e ngjarjes, por nuk ka ndërmarrë asnjë veprim.
Të dy të pandehurit shprehën pendesë dhe kërkuan falje për veprimet e tyre. Gjykata vendosi të dënojë Florian Mukën me 12 vite burg në bazë të nenit 76 të Kodit Penal, për shkak të pranimit të krimit dhe kërkesës për falje. Ndërsa i mituri K.M. u dënua me 1 vit burg për moskallëzim krimi, dënim që e ka përmbushur gjatë kohës në paraburgim, dhe për rrjedhojë u la i lirë.
Ngjarja e rëndë ndodhi pas një konflikti që dyshohet se nisi në rrjete sociale dhe më pas përshkallëzoi në përleshje fizike në qendër të Fierit. Grei Bihuci, 20 vjeç, u qëllua me thikë nga Florian Muka dhe K. Muka, të dy kushërinj të parë. Shoku i viktimës, Olti Serjanaj, 20 vjeç, u plagos teksa përpiqej të ndalonte sherrin.
Grei Bihuci ishte student në degën Teknologji Informacioni dhe Komunikimi dhe punonte pasditeve si kamarier pranë vendit ku ndodhi ngjarja.
