Ngjarja tragjike që tronditi Tiranën më 18 nëntor 2024, me vrasjen e një 14-vjeçari, ka ngjallur një shqetësim të gjerë, i cili po vazhdon të mbajë vëmendjen e mediave audiovizive.
Autoriteti i Medias Audiovizive thekson se, ndërsa është e natyrshme që mediat të informojnë publikun, duhet marrë parasysh ndikimi e kësaj ngjarjeje mbi fëmijët dhe prindërit, veçanërisht pas ndikimit të shkaktuar nga prezenca e ekipeve të xhirimit në shkolla.
Sipas Autoritetit, kjo ngjarje ka shkaktuar shqetësime për prindërit dhe fëmijët që frekuentojnë shkollën ku ndodhi ngjarja.
Ata kanë kërkuar ndihmën e autoriteteve për të mbrojtur fëmijët nga presioni i mediave. Në këtë kontekst, Autoriteti i Medias Audiovizive ka rikujtuar detyrimet e ligjit, duke kërkuar nga mediat që të shmangin identifikimin e fëmijëve të përfshirë në ngjarje të tilla, të sigurojnë pëlqimin e prindërve për intervistimin e të miturve dhe të respektojnë të drejtat e tyre, duke evituar çdo formë abuzive që mund të dëmtojë fëmijët ose të rrisë stresin e tyre pas traumës.
Për më tepër, është kërkuar që ngjarja të raportohet me profesionalizëm dhe etikë, duke pasur parasysh dhimbjen dhe dinjitetin e të prekurve.
Autoriteti do të vijojë të monitorojë situatën dhe do të marrë masa për të siguruar respektimin e ligjit, nëse zbulohet ndonjë shkelje nga ana e mediave.
