Prokuroria pranë Gjykatës së Shkallës së Parë të Juridiksionit të Përgjithshëm në Fier ka përfunduar hetimet dhe ka dërguar për gjykim shtetasin H.Gj., i akuzuar për votim të dyfishtë gjatë zgjedhjeve të pjesshme vendore në Lushnjë, më 6 mars 2022.
Ai akuzohet për veprën penale “Votimi më shumë se një herë ose pa u identifikuar”, parashikuar nga neni 327/a i Kodit Penal.
Sipas hetimeve të prokurorisë, rezulton se H.Gj. ka votuar dy herë në të njëjtën zonë zgjedhore, ZAZ 54, në njësinë Dushk një herë si komisioner në qendrën e votimit nr. 2818 dhe një herë si qytetar në qendrën nr. 2817.
Të dhënat janë konfirmuar përmes pajisjes elektronike të identifikimit të zgjedhësve, të vendosur në çdo qendër votimi.
Prokuroria thekson angazhimin për ndjekjen dhe ndëshkimin e çdo akti që cenon integritetin e zgjedhjeve dhe sistemin demokratik në vend.
