Sipas të dhënave më të fundit nga Komisioni Qendror i Zgjedhjeve, deri në orën 19:00 të datës 11 maj 2025, janë regjistruar 191.912 zarfe me fletëvotime nga diaspora shqiptare.
Nga 245.935 zarfe të dërguara, 227.097 fletëvotime janë tërhequr nga zgjedhësit, ndërsa 18.326 zarfe kanë mbetur të papërfituara nga qytetarët të regjistruar në Platformën Elektronike të Votimit. Po ashtu, 2.502 zarfe janë akoma në kutinë e posaçme.
Italia ka dërguar numrin më të madh të fletëvotimeve, me gjithsej 72.800 zarfe, e pasuar nga Greqia me 52.942 dhe Gjermania me 20.318.
Në ndarjen sipas qarqeve, Tirana kryeson me 41.748 zarfe, ndjekur nga Fieri me 25.949 dhe Durrësi me 19.699.
Këto zgjedhje parlamentare përfaqësojnë herën e parë që shqiptarët jashtë vendit marrin pjesë në procesin zgjedhor, i cili nisi rreth një muaj më parë.
Administrimi i votave të diasporës po zhvillohet në Pallatin e Sportit “Feti Borova” pranë Parkut Olimpik në Tiranë.
