Kryetarja e Bashkisë së Shkodrës, Voltana Ademi ka reaguar pas sulmeve që kryeministri Rama bëri ditën e sotme ndaj saj në qytetin verior. Rama e cilësoi Ademin si një shembull drithërues të injorancës ndërsa tha se Shkodra po mbahet peng nga komunizmi.
Në reagimin e saj Ademi thotë se Rama nuk bën gjë tjetër veçse dëshmon frikën e dikujt që po jeton ditët e fundit të pushtetit.Ajo ka thënë se Rama nuk ka mbajtur asnjë premtim e sillet rrugëve të vendit me arrogancë, por në 25 prill kjo do të marrë fund.
Reagimi i plotë i Voltana Ademit:
Edi Rama bredh nëpër Shqipëri me të vetmen alternativë që i ka mbetur: Sulmet ndaj opozitës. Pas 8 vjet dështimesh në çdo fushë,pas 8 vitesh ku të vetmit që fituan ishin oligarkët e tij, pa asnjë bilanc konkret dhe asnjë arritje Edi Rama, i lodhur dhe i pashpresë mundohet të hedhë baltë mbi PD, drejtuesit dhe anëtarët e simpatizantët e saj si e vetmja menyre komunikimi që i ka mbetur për të folur me shqiptarët.
Sot nga Shkodra ai më sulmoi me gjuhën dhe fjalorin e vetëm që ai njeh, atë të fyerjes dhe sharjes. Shkodra e qytetarisë dhe e kultures nuk e ka pranuar as në kohët e egra te komunizmit arrogancën e pushtetit. Aq më pak mund ta pranojë sot. Duke sulmuar Shkodrën, qytetarët e saj dhe mua si kryetare e bashkisë, Edi Rama nuk bën gjë tjeter vetëm se dëshmon friken dhe dobësin e dikujt që po jeton ditët e fundit te pushtetit. Njeriu që s’ka mbajtur asnjë premtim dhe që e ngeci Shqiperine për 8 vjet, sot sillet rrugëve të vendit me arrogancë por lodhet më kot.
Ai e ka të qartë se në 25 prill do të largohet me votën masive të Shkodrës dhe gjithë Shqipërisë. Sepse ndryshimi po vjen dhe shqiptarët mezi po e presin. Ne 25 prill Rama dhe arroganca e tij do të largohen dhe Shqipëria qytetare do të fitojë.
