Komisioni Qendror i Zgjedhjeve është duke vazhduar me numërimin e votave me postë për zgjedhjet parlamentare të 9 shkurtit.
Deri tani, me 14.36% të votave të numëruara, Lëvizja Vetëvendosje (LVV) ka fituar 2,669 vota, që përbëjnë 44.33% të totalit.
Në vendin e dytë është Lidhja Demokratike e Kosovës (LDK), e cila ka marrë 2,020 vota, ose 33.55%, ndërsa koalicioni Aleanca për Ardhmërinë e Kosovës, Nisma Socialdemokrate dhe Konservatorët e Intelektualët është duke u pozicionuar në 3.68% me 583 vota. Partia Demokratike e Kosovës (PDK) ka marrë deri tani 390 vota, ose 6.48%.
Për këto zgjedhje, qytetarët e Kosovës jashtë vendit mund të votojnë në dy mënyra, përmes postës dhe duke votuar fizikisht në përfaqësitë diplomatike të Kosovës.
Numërimi i votave me postë ka nisur më 28 shkurt, ndërsa ai i votave nga përfaqësitë diplomatike është pothuajse i mbaruar. KQZ ka aprovuar më shumë se 63,000 pako, të cilat pritet të përmbajnë fletëvotime.
Pas përfundimit të numërimit të votave dhe certifikimit të rezultateve, do të hapet rruga për formimin e institucioneve të reja. Sipas rezultateve preliminare, pas numërimit të votave të rregullta, LVV prin me 40.80% të votave, e ndjekur nga PDK me 22.05% dhe LDK me 17.64%. Në rendin e katërt është Aleanca për Ardhmërinë e Kosovës me 7.46%.
Partitë e komunitetit serb udhëhiqen nga Lista Serbe me 4.62%. LVV gjithashtu kryeson në përfaqësitë diplomatike.
