Katër muaj pas zgjedhjeve të 9 shkurtit, Kuvendi i Kosovës vijon të mbetet i pakonstituuar, duke e lënë vendin pa institucione të reja funksionale.
Këtë të mërkurë, deputetët u mblodhën për herë të 30-të në një seancë të shkurtër, pa arritur sërish ndonjë zgjidhje për zhbllokimin e procesit.
Ngërçi ka mbetur në pikën e njëjtë: zgjedhja e kryetarit dhe pesë nënkryetarëve të Kuvendit. Lëvizja Vetëvendosje, si fituese e zgjedhjeve, ka propozuar Albulena Haxhiun për kryetare, por ajo nuk ka siguruar shumicën prej 61 votash të nevojshme në votim të hapur.
Për 22 herë radhazi, partitë opozitare PDK, LDK, AAK dhe Lista Serbe kanë refuzuar të propozojnë anëtarët për komisionin që do të mundësonte votimin e fshehtë, formë alternative që po shtyn LVV-ja.
Çështja është përshkallëzuar në përplasje kushtetuese. Opozita ka çuar në Gjykatën Kushtetuese kërkesën për interpretim të legalitetit të propozimeve të Vetëvendosjes, duke kërkuar gjithashtu një masë të përkohshme për pezullimin e seancave derisa të merret vendim përfundimtar.
Ndërkohë, në përpjekje për një zgjidhje politike, kryetari i LDK-së, Lumir Abdixhiku, ka propozuar krijimin e një Qeverie Uniteti, duke paralajmëruar publikimin e një platforme 15 pikëshe për bashkëpunim ndërpartiak.
“Kjo krizë mund të shërbejë si mundësi për konsensus”, shkroi ai në rrjete sociale.
Por LVV ka refuzuar kategorikisht idenë, duke e cilësuar si përpjekje për të anashkaluar vullnetin e popullit.
“Qeveria e tranzicionit është kjo që kemi tani. Nuk kemi nevojë për një tjetër me këtë emër”, deklaroi Albulena Haxhiu.
Përballë këtij bllokimi, është hedhur në diskutim edhe mundësia e zgjedhjeve të reja parlamentare.
Vetëvendosje ka sugjeruar që ato të mbahen njëkohësisht me zgjedhjet lokale në tetor, por kjo ide nuk gjen mbështetje të gjerë.
PDK është shprehur se nëse ka nevojë për zgjedhje të reja, ato duhet të zhvillohen më herët, ndërsa LDK paralajmëron vështirësi teknike për organizimin paralel të dy proceseve zgjedhore.
Presidentja Vjosa Osmani, në një deklaratë më 5 qershor, ka paralajmëruar për pasojat e vonesës, duke theksuar se ngërçi dëmton kredibilitetin institucional dhe kursin euroatlantik të vendit.
Një mesazh i ngjashëm ka ardhur edhe nga diplomatët e QUINT-it dhe përfaqësuesit e BE-së, të cilët kanë takuar kryeministrin në detyrë, Albin Kurti, për të kërkuar formimin e shpejtë të institucioneve, në interes të stabilitetit dhe zhvillimit të Kosovës.
