Pyjet e Amazonës, ose siç njihen ndryshe “mushkritë e botës” po vijojnë të shkatërrohen nga zjarri.
Organizatat mjedisore dhe specialistë të ndryshëm, ia kanë faturuar fajin presidentit të vendit, të cilin e kanë akuzuar për inkurajim të interesave të biznesit.
Ndërkohë gazetari i Zërit të Amerikës, Arash Arabasadi, njofton se qeveria braziliane ka angazhuar ushtrinë për shuarjen e zjarrit.
Ndërsa dhjetëra aeroplanë po hedhin ujë nga ajri, duke hasur edhe shumë vështirësi.
“Këto gjëra ndodhin çdo vit. Por nuk jemi në gjendje të themi se kush është përgjegjës. E njëjta gjë çdo vit edhe askush nuk ndëshkohet”, u shpreh njëri prej fermerëve të zonës.
Agjencia Braziliane e Hapësirës, bën me dije se vatrat e zjarrit janë shtuar me 80%, në krahasim me 1 vit më parë.
Djegia e “mushkrive të botës”, ka shqetësuar edhe liderët e mëdhenj botërorë, të cilët kanë premtuar mbështetje për shuarjen e zjarreve.
Amazona ofron 20% të oksigjenit në botë dhe specialistët e mjedisit paralajmërojnë se djegia e saj do të sillte humbjen e betejës me ndryshimin e kushteve klimaterike.
