Një tjetër rast për blerjen e votave është denoncuar ditën e sotme në vend. Ngjarja ka ndodhur në Dibër, në fshatin Maqellarë, ku mbështetës të Partisë Demokratike kanë ndaluar një makinë për të cilën thonë se personat që ndodheshin brenda tij, po shpërndanin para në këmbim të votave.
Ka qenë kandidati i Partisë Demokratike, Xhelal Mziu ai që e ka publikuar rastin në fjalë në Facebook. Në pamje duket se janë disa banorë që kanë bllokuar mjetin, ndërsa në vendngjarje ka mbërritur edhe policia. Nuk ka pasur ende një reagim zyrtar nga Partia Demokratike dhe nga policia e Dibrës.
“Nxirre mo përjashta. Asnjë nuk është prek me dorë. Nxirre jashtë atë, se merr gjëra nga makina. Nxirre se i fut në çorape. Shiko si bën lëvizje. I mori brenda,”-dëgjohen qytetarët të thonë në video.
Po ashtu dikush tjetër dëgjohet të thotë: “Ja ku janë lekët“.
Kjo ngjarje vjen në vazhdimësi të ngjarjes së rëndë që ndodhi ditën e djeshme në Elbasan. Përfaqësues të PD ndaluan një mjet për të cilin thanë se po ashtu po ndante para në këmbim të votave. Si pasojë nisën përplasejt me armë dhe mbeti i vrarë Pjerin Xhuvani e po ashtu u plagosën 4 persona të tjerë.
https://www.facebook.com/mziuxhelal/videos/465184644781564/
