Në ndjekje të trazirave në Venezuelë është shprehur dhe Sekretari Amerikan i Shtetit, Mike Pompeo, se në rast nevoje, Shtetet e Bashkuara të Amerikës do të ndërmarrin një sulm ushtarak.
Sekretari amerikan i Shtetit Mike Pompeo tha të mërkurën se Shtetet e Bashkuara janë të gatshme të ndërhyjnë ushtarakisht për të frenuar trazirat e tanishme në Venezuelë.
“Një veprim ushtarak është i mundur,” tha diplomati më i lartë i SHBA-së për rrjetin televiziv Fox Business. “Nëse kjo do të kërkohet, Shtetet e Bashkuara do ta bëjnë,” – tha ai.
Megjithatë, ai përsëriti se SHBA-ja do të preferonte një kalim paqësor të pushtetit në Karakas, nga presidenti socialist Nikolas Maduro tek presidenti i përkohshëm i vetëshpallur, Juan Guaido.
Pompeo u tha intervistuesve se Maduro, përballë protestave të rrugës kundër regjimit të tij, ishte gati të largohej nga Venezuela për në Kubë të martën, por Rusia e bindi të qëndronte për të kundërshtuar thirrjen e zotit Guaido drejtuar ushtrisë për të përmbysur Maduron.
Vetë Maduro dhe ministria e jashtme ruse mohuan zërat për largimin e Maduros. Moska tha se kërkesa e SHBA ishte pjesë e “luftës së saj informative” për të demoralizuar ushtrinë venezueliane dhe për të nxitur një grusht shteti.
Venezuela ndodhet që prej ditës së djeshme në një situatë mjaft kaotike, ku ushtarakët po përleshen me protestuesit në përpjekje për t’i shpërndarë. Kjo tablo ka ngjallur tek ndërkombëtarët frikën e shpërthimit potencial të një lufte civile.
