Kryebashkiaku i Tiranës, Erion Veliaj, ka kaluar ditën e parë në Bllokun e Sigurisë, në rrugën “Mine Peza”, pas arrestimit të tij nga agjentët e BKH-së të hënën.
Paraditen e të martës, personi i parë që ka vizituar Veliajn ishte drejtori juridik i Bashkisë së Tiranës, Alban Dokushi. Ai është filmuar duke hyrë në ambientet e Bllokut të Sigurisë, me një kopje të librit “Mjelma e Zezë” të autorit Nassim Nicholas Taleb, në duar.
Ky libër, që trajton konceptin e ngjarjeve të papritura dhe ndikimin e tyre të madh, mund të jetë një kërkesë e Veliajt për ta lexuar gjatë kohës që ndodhet në paraburgim.
Pas arrestimit të Veliajt, SPAK bëri të ditur se nga hetimet e deritanishme është zbuluar se ai dhe bashkëshortja e tij, Ajola Xoxa, kanë krijuar një mekanizëm përfitimesh të parregullta, duke përdorur fonde publike të administruara nga Bashkia Tiranë.
Ky mekanizëm dyshohet të ketë përfshirë të paktën 10 raste dhe ka ngritur dyshime për korrupsion dhe pastrim parash.
SPAK po ashtu ka hetuar se Veliaj ka miratuar shpërndarjen e fondeve publike dhe lejeve të ndërtimit për subjekte të lidhura ngushtë me të, përfaqësuesit e të cilëve janë të përmendur në hetim.
Këto fonde janë kanalizuar më pas tek organizata jofitimprurëse dhe shoqëri të lidhura me bashkëshorten e tij, Ajola Xoxa, dhe individë të afërt me të.
Erion Veliaj akuzohet nga SPAK për “korrupsion pasiv të funksionarëve të lartë shtetërorë” në nëntë raste dhe për “pastrimin e produkteve të veprës penale”. Bashkëshortja e tij, Ajola Xoxa, akuzohet për korrupsion pasiv, pastrim parash dhe fshehje pasurie.
SPAK gjithashtu ka vënë në hetim deputeten e PS-së, Klotilda Bushka, për dyshimet se ka penguar hetimin, si dhe dy prokurorët që po trajtojnë çështjen, Olsi Dado dhe Altin Dumani.
