Sot në orën 12:00, Gjykata e Lartë pritet të shqyrtojë kërkesën për ndryshim të masës së sigurisë të kryebashkiakut të Tiranës, Erion Veliaj, aktualisht në arrest.
Seanca do të zhvillohet në dhomë këshillimi, pa praninë e palëve, me relatore gjyqtaren Albana Boksi dhe anëtarë Medi Bici e Sokol Binaj.
Veliaj është arrestuar më 10 shkurt në ambientet e Bashkisë Tiranë dhe akuzohet nga SPAK për një sërë veprash penale të rënda, përfshirë “korrupsion pasiv i funksionarëve të lartë shtetërorë” në nëntë raste, “pastrim të produkteve të veprës penale” si dhe “fshehje apo deklarim të rremë të pasurisë dhe interesave private”.
Hetimet paraprake të SPAK kanë zbuluar një skemë të organizuar, ideuar dhe drejtuar nga vetë Veliaj dhe bashkëshortja e tij, Ajola Xoxa, përmes së cilës janë përfituar në mënyrë të kundërligjshme fonde publike të Bashkisë së Tiranës, me qëllim përfitime personale dhe pasurim të familjes. Ndaj Xoxës është caktuar masa e sigurisë “detyrim paraqitje”.
