Pesë zyrtarët policorë të dyshuar për vdekjen e 27-vjeçarit Agon Zejnullahu janë liruar nga paraburgimi, pas vendimit të fundit të Gjykatës së Apelit. Më 9 korrik, Gjykata Themelore në Prishtinë, dega në Lipjan, u kishte caktuar atyre një muaj paraburgim, por Apeli më 17 korrik e anuloi këtë aktvendim, duke e kthyer çështjen për rivendosje.
Më 23 korrik, Themelorja vendosi sërish që pesë zyrtarët të qëndronin në paraburgim, vendim i cili u apelua nga mbrojtja. Avokati Besnik Berisha, përfaqësuesi ligjor i njërit prej të dyshuarve, njoftoi për lirimin përmes një postimi në Facebook, ku shkroi: “Kjo nuk ishte thjesht një betejë për lirimin e pesë zyrtarëve, ishte një betejë për arsyen, për të drejtën dhe për të mos lejuar që frika nga opinioni ta zëvendësojë ligjin”.
Ngjarja ndodhi në orët e para të mëngjesit të 7 korrikut, kur Agon Zejnullahu ndërroi jetë pak pasi u arrestua nga policia në Lipjan. Sipas deklaratës zyrtare të policisë, i riu dyshohej se ndodhej nën ndikimin e alkoolit dhe po sulmonte kalimtarë dhe automjete, para se të ndalohej nga autoritetet. Vdekja e tij u konstatua në vendngjarje nga ekipi mjekësor.
Familjarët e viktimës dhe avokati i tyre kanë akuzuar policinë për përdorim të forcës së tepruar. Po ashtu, disa përfaqësues të shoqërisë civile kanë ngritur shqetësime pas publikimit të pamjeve të shpërndara në internet, të cilat sipas tyre tregojnë keqtrajtim të të ndjerit nga ana e forcave të rendit.
Pas kësaj ngjarjeje, komandanti i Policisë për rajonin e Lipjanit, Argjend Gashi, dha dorëheqje.
