Rastet e para me variantin Delta të koronavirusit janë konfirmuar tashmë edhe në Ballkan dhe duket se po vazhdojnë të përhapen.
Shteti i radhës që ka konfirmuar rastet e para me mutacionin e shfaqur për herë të parë në Indi, është edhe Serbia.
Ministria e Shëndetësisë ka konfirmuar të enjten dy rastet e para me variantin Delta. Gjithashtu në njoftim thuhet se dy pacientët e infektuar janë në gjendje të qëndrueshme. Ndër të tjera bëhet e ditur se dy të infektuarit kanë qëndruar jashtë shtetit dhe nuk e kishin marrë ende vaksinën kundër koronavirusit.
Kroacia është vendi i parë në Ballkan që ka konfirmuar raste pozitive me varinatin Delta dhe më pas ishte Kosova në 29 qershor që konfirmoi dy rastet e para.
Ministria e Shëndetësisë së Kosovës bëri me dije se dy të infektuarit ishin në gjendje të mirë dhe se janë gjurmuar kontaktet e tyre në mënyrë që të ndalohet përhapja më tej e mutacionit.
Varianti Delta është identifikuar për herë të parë në Indi dhe sipas Organizatës Botërore të Shëndetësisë është deri në 60% më ngjitës. Po ashtu sipas studimeve ky variant do të përbëje 90% të rasteve me koronavirus në Europë në muajin gusht.
Në Shqipëri nuk janë konfirmuar ende rastet e para më këtë variant të koronavirusit, por Ministria e Shëndetësisë ka bërë thirrje për kujdes dhe vigjilencë.
