Drejtoria e Përgjithshme e Arsimit Parauniversitar e ka mohuar lajmin se vaksinimi për punonjësit e sistemit arsimor do të jetë tashmë një detyrim. Në një reagim që erdhi si përgjigje e lajmit të publikuar nga disa media, thuhet se është bërë një keqinterpretim i kërkesave për informacion rutinë në zyrat dhe institucionet arsimore, për numrin e mësuesve që janë duke vijuar procesin e vaksinimit me dozën e dytë.
Në reagim thuhet se procesi i vaksinimit është rekomandim i ekspertëve të shëndetësisë për t’u mbrojtur nga virusi, por nuk është i detyrueshëm.
Reagimi i plotë:
Në lidhje me njoftimet e shpërndara ditën e sotme në disa portale, sa i takon vaksinimit me detyrim të punonjësve mësimorë dhe stafeve ndihmëse, sqarojmë se nuk ekziston asnjë vendim për vaksinim me detyrim.
Kemi të bëjmë me një keqinterpretim të kërkesave për informacion rutinë në zyrat dhe institucionet arsimore, për numrin e mësuesve të cilët janë duke vijuar procesin e vaksinimit me dozën e dytë.
Procesi i vaksinimit është rekomandim i ekspertëve të shëndetësisë për t’u mbrojtur nga COVID-19, por në asnjë rast nuk është i detyrueshëm për asnjë punonjës mësimor apo staf ndihmës në Institucionet Arsimore.
Ditën e sotme në disa media qarkulloi një mesazh ku thuhej se stafi drejtues, mësuesit etj. duhet të jenë të vaksinuar deri në muajin shtator. Në mesazh kërkohej që mësuesit që nuk e kanë bërë vaksinën duhet të plotësojnë urgjentisht tabelën dhe duhej bërë raportimi urgjent për Zyrën Vendore Arsimore.
Mesazhi i plotë:
Pershendetje. Brenda dites se sotme do te dergoni listën e mesuesve qe nuk jane vaksinuar. Ju lutemi sqaroni mesuesit se muajin Shtator 2021 i gjithe stafi drejtues, mesimor dhe ai ndihmes i institucioneve arsimore duhet te jete i vaksinuar. Edhe njehere lexoni mire mesazhin te gjithe mesuesit qe nuk e kane bere vaksinen urgjent te plotesojne tabelen! Raportimi duhet urgjent per ZVA.
