Koronavirusi po përhapet me shpejtësi në të gjithë botën, ndërkohë po me të njëjtin ritëm po punohet edhe për gjetjen e vaksinës.
Një lajm shprese vjen nga Wuhani, epiqendrën e virusit vdekjeprurës.
Mësohet se vaksina është testuar tashmë tek 108 persona.
Këta të fundit do të qëndrojnë në karantinë, ku do të raportojnë të gjitha detajet mbi gjendjen e tyre shëndetësore tek studiuesit.
Sipas mediave kineze, duhet të paktën 1 muaj për të parë nëse kjo vaksinë do të jetë apo jo efektive.
Chen Wei, studiuesi që udhëhoqi kërkimet shprehet se nëse rezultatet e para do të jenë pozitive, vaksina do të testohet në vende të tjera të prekura përpara vjeshtës.
“Nëse funksionon, do t’i japim fund pandemisë. Nëse rezultatet fillestare tregojnë se vaksina është e sigurt dhe pandemia vazhdon të përhapet, përmes bashkëpunimit ndërkombëtar, ne do ta testojmë jashtë vendit përpara vjeshtës”, tha ai.
Në rang global koronavirusi ka prekur mbi 873 mijë persona, ndërsa numërohen 43.294 viktima dhe 184.937 të shëruar.
Në Europë shteti më i prekur është Italia dhe më pas Spanja.
Në vendin tonë ndërkohë sipas ekspertëve rritja është normale dhe nuk kemi prekur akoma pikun.
