Në një kohë sfidash, kur Bashkimi Europian përballet me kërcënime nga jashtë prej agresionit rus dhe nga brenda nga ekstremistët dhe demagogët, Ursula von der Leyen mbron fuqishëm interesat e Europës. Ky angazhim është njohur me Çmimin prestigjioz ndërkombëtar Karli i Madh, një vlerësim për përpjekjet e saj për të udhëhequr BE-në si një fuqi për paqen, demokracinë dhe partneritetin.
Drejtoria e Çmimit Karl i Madh e vlerëson von der Leyen për arritjet e saj të shquara, përfshirë menaxhimin e pandemisë COVID-19, qëndrimin e fortë kundër Rusisë dhe nismat për “Green Deal”, përmes të cilit BE synon të bëhet neutrale ndaj klimës deri në vitin 2050.
Në vitin 2019, Ursula von der Leyen u bë presidente e Komisionit Europian dhe u rizgjodh në mandatin e dytë pas zgjedhjeve të Parlamentit Europian në qershor 2024. Para kësaj, ajo ka pasur një karrierë të suksesshme si ministre në qeverinë gjermane, duke përfshirë postin e ministres së Mbrojtjes.
Në deklaratën për çmimin, drejtorët e Çmimit Karl i Madh theksuan se modeli europian i jetesës, i bazuar në liri, paqe, demokraci dhe mirëqenie, është i rrezikuar. Ata vlerësuan von der Leyen për udhëheqjen e saj të vendosur dhe të suksesshme për të përballuar kërcënimet ndaj Europës.
Presidentja e Komisionit të BE-së shprehu falënderime të thella për këtë nder dhe e quajti vlerësimin një ndihmë për të gjithë ata që besojnë tek Europa./DW
