Kjo javë duket se është piku i numrit të të infektuarve me COVID-19 në vend dhe si duket rritja e madhe e numrit të të prekurve ka sjellë edhe një numër të lartë thirrjesh në numrin zyrtar të Urgjencës Kombëtare.
Sipas Urgjencës Kombëtare, javën e kaluar në numrin 127 janë regjistruar 11 mijë e 200 thirrje, rreth 2500 thirrje më shumë se javën e kaluar.
Gjithashtu, në një njoftim zyrtar nga UK thuhet se janë dyfishuar edhe rastet e referuara për tamponë te epidemiologët.
Kohët e fundit ishte vënë re një ulje e numrit të telefonatave, por rritja e papritur e rasteve me të infektuar nga koronavirus i bëri qytetarët t’i rikthehen përsëri këtij numri për të adresuar problemet e tyre.
“Ruani distancën fizike 1.5 metër dhe mbani maska”, është thirrja që Urgjenca u bën qytetarëve, ndërkohë që kujdesi dhe respektimi i masave është tepër i rëndësishëm.
Njoftimi i plotë
Nisur nga situata e krijuar dhe numri në rritje i të infektuarve me COVID-19, pranë Qendrës Kombëtare të Urgjencës Mjekësore është rritur edhe numri i thirrjeve drejt numrit unik 127.
Gjatë javës që lamë pas drejt numrit 127, janë regjistruar rreth 11 mijë e 2 qind thirrje, rreth 2500 thirrje më shumë nga java e kaluar. Po ashtu gjatë kësaj jave janë dyfishuar rastet e referuara për tampon tek epidemiologët. Duke pasur parasysh rastet e reja të konfirmuara me COVID-19, Qendra Kombëtare e Urgjencës Mjekësore, ju këshillon të tregoheni të kujdesshëm, të ruani distancën dhe të ndiqni me përpikmëri protokollet e vendosura nga Ministria e Shëndetësisë dhe Mbrojtjes Sociale.
Ruani distancimin fizik mbi 1.5 metër. Kur nuk arrihet distancimi fizik përdorimi i maskës është i domosdoshëm. Ruani etiketën respiratore. Kur kolliteni apo tështini përdorni shami letre ose këndin e brrylit. Masat e higjienës personale duhet të kombinohen me larjen sa më të shpeshtë të duarve për më shumë se 20 sekonda.
Evitoni ambientet e mbyllura dhe grumbullimet me shumë njerëz dhe kujdesuni për të moshuarit. Mos neglizhoni shenjat e sëmundjes prandaj telefononi në numrin unik të Urgjencës Kombëtare, 127.
QKUM në shërbimin tuaj!
