Gazetari Artan Hoxha ka folur sot për kultivimin e kanabisit në vendin tonë dhe ndikimin që ka pasur pandemia tek ky aktivitet i jashtëligjshëm.
Në një intervistë për “AbcNews”, Hoxha përmendi disa faktorë që do të ndikojnë në shtimin e prodhimit për këtë vit, një ndër to edhe një urdhër të ardhur nga ‘lart’ për vijimin e punës.
“U përdor farë e vjetshme, që ka probleme, ose ajo që kishte ardhur në fillim të vitit, ose fara vendase. Sasia e kultivuar deri më tani është shqetësuese. Tregu e ndikon kultivimin. Në Shqipëri ka shkuar 10 mijë euro kilogrami. Është rritur kërkesa dhe çmimi. Është gjetur edhe fuqia punëtore kollaj, se nuk kanë ikur të rinjtë jashtë dhe punojnë këtu. Policia po ruante zonat urbane, dhe ka lënë zbuluar pjesën tjetër. Avioni i Guardia di Financia nuk është këtë vit. Jemi vetëm. Policia është këtej. Dikush lart ka marrë vendim që të rritet prodhimi i kanabisit. Sivjet nuk do të ketë zjarre. Tjetërkush po e ruan malin. Mbajeni mend! Nuk do t’i afrohet dot kush malit që të vendosi zjarr, sepse e ruan tjetër kush. Pastaj do mbledhim kufomat në zonat urbane. Se nuk i zgjidhin punët më gjyq ata,”-tha Hoxha në fjalën e tij.
Hoxha u ndal edhe njëherë te mungesa e farës së kanabisit që vjen për shkak të bllokimit të kufijve.
Sipas gazetarit mungesa e farës holandeze, që është e çertifikuar ka bërë që të përdoret farë e vjetër, ose vendase.
Mirëpo, ndonëse ka mungesë të farës, Hoxha thotë se këtë vit ka një shtrirje më të madhe të kultivimit të kanabisit në vend.
“Farën nuk mund ta marrësh direkt. Këtë vit u bë e vështirë për tu siguruar, për shkak të bllokimit. Nuk e kishin programuar që kufiri do mbyllej kaq shpejt dhe kjo krijoi problemin e farës. Në momentin që kërkuan të merreshin me farën, ata përdorën atë që kishin, po ajo ka probleme, ose farën vendase. Nga vëzhgimi që kam bërë më rezulton se sasi që është kultivuar deri tani është shqetësuese. Është tregu që e ndikon kultivimin, në Shqipëri ka shkuar edhe 1 mijë euro kilogrami. Nga 100 është dhjetëfishuar. Rritja e çmimit në treg, gjetja e fuqisë punëtore kollaj.”, ka thënë ai.
Gazetari shton më tej se gjatë kësaj periudhe ka parë zona që janë rimbjellë dhe sipas tij një gjë e tillë ka kosto.
Po ashtu ai thotë se këtë vit ka hasur elementë të kultivimit që nuk i kishte parë më herët.
