Nuredin Dumani, i penduar i drejtësisë, ka dëshmuar në gjykatë lidhur me dosjen “Plumbi i artë”, duke zbuluar detaje të reja mbi lidhjet e tij me persona të botës së krimit.
Ai përmendi Behar Bajrin, të cilin e kishte njohur përmes Elton Bashës dhe Arlind Bushatit, një prej viktimave të masakrës së Dobraçit.Dumani ka rrëfyer se kishte zhvilluar takime me Bajrat për të organizuar një goditje ndaj Dorjan Duli dhe Genc Tafilit, duke i dhënë atyre mbi 1 milion euro për këtë marrëveshje.
“Elton Basha është një mik i imi dhe është nga Burreli. Rrinte në Durrës dhe kam 15 vite që e njoh. Në telefon e kam pas rregjistru me emrin ‘Bisha’. Me Behar Bajrin kam komuniku nëpërmjet Elton Bashës dhe nëpërmjet Arlind Bushatit. Çova Eltonin me një djalë tjetër në takim me Bajrat, këta të fundit shkojnë 10 veta me armë. Behar Bajri më kërkoi për të bërë goditje për Dorjan Dulin dhe Genc Tafilin dhe i kam dhënë mbi 1 mln e gjysmë euro. Ramë dakord për këtë marrëveshje. Nuk morëm asnjë lloj iniciative. Behar Bajrit i kam kërku Talo Çelën. Kishte thashetheme që Talo Çela rrinte te Suel Çela, por jo gjëra të vërteta. Me Behar Bajrin kam komuniku me SKY ECC,”-ka rrëfyer Dumani gjatë seancës në GJKKO.
Arlind Bushati, një nga viktimat e masakrës së Dobraçit, ka qenë i lidhur me grupin e Bajrave dhe ka tradhtuar personat që i prezantonte si shokë, të cilët ndodheshin me të në makinë në momentin e atentatit.
Sipas dëshmisë së Nuredin Dumanit, Bushati ka shërbyer si ndërmjetës mes tij dhe Behar Bajrit, duke treguar për një përfshirje të tij në një komplot të mirëorganizuar.
