Protesta e banorëve të “Unazës së Re”, të cilët kundërshtojnë ndërtimin e projektit të “Unazës së Madhe” që prek banesat e tyre ka vijuar edhe sot.
Pavarësisht temperaturave të ulëta që kanë mbërthyer vendin, banorët në ditën e 75-të të protestës, kanë bllokuar rrugën kryesore, ndërsa me thirrje dhe pankarta në duar kërkojnë anulim të projektit.
“Ne jemi shembulli i gjithë Shqipërisë se kemi 75 ditë që luftojmë për shtëpitë tona. Jo nga Kamza, por edhe nga Saranda do vijmë këtu ta tërheqim zvarrë Edi Ramën se e ka mbushur kupën.
Duan të na fusin në konflikt për një arsye vërtet madhore, që të mbushë xhepat Edi Rama. Këtu po protesojmë, këtu është puna jonë. Në “Unazën e Re” vendosim ne, vendos sovrani. Por ti nuk di të mbash fjalën se je femër”, u shpreh një nga banorët.
Ashtu si dhe herët e tjera të pranishëm në protestë, ishin edhe deputetët e opozitës. Deputeti demokrat, Klevis Balliu nga protesta nuk kurseu akuzat ndaj kreut të qeverisë, Edi Ramës, ndërsa paralajmëroi edhe revolta masive.
“Të dashur qytetarë siç kishim lajmëruar këtu do japin llogari. Në seancën e fundit parlamentare nuk donin diskutime se e dinim që do flisnim për aferën korruptive të “Unazës së Re”. Ku më mirë sesa këtu në këtë shesh që ne e kemi bërë shesh heroik. Pa anulimin e projektit nuk do të ketë asnjë hap nga kjo qeveri. Ndërkohë që ky zotëria kërkon negociata me studentët, bën sikur bën pseudo negociata me disa banorë të “Astirit”, por me sovranin nuk ka negociata. Ku nuk ka parlament dhe institucione, nuk mbetet gjë tjetër veçse revolta,”- tha deputeti demokrat, Klevis Balliu.