Kryeministri Edi Rama ka publikuar mbrëmjen e sotme marrëveshjen e arritur me Guvernatorin e Bankës së Shqipërisë, Gent Sejko, për shtyrjen e kësteve të kredive.
Lajmin e ka bërë të ditur me anë të një reagimi në Facebook, ku shkruan se është gjetur zgjidhja për të gjithë bizneset që ‘kanë hall’ me bankat për kreditë për shkak të COVID-19.
Kreu i qeverisë ka publikuar edhe urdhrin, ku thuhet se kreditë do të shtyhen deri më 31 maj 2020, për shkak të situatës së krijuar nga Coronavirusi.
Më herët ditën e sotme, Bashkia e Tiranës njoftoi se do të shtyjë deri më 17 maj afatin e aplikimit për kredi të buta, teksa kryeministri ka njoftuar se brenda javës do ketë gati një plan për ringritjen e ekonomisë.
Deri tani shtete të ndryshme kanë ndërmarrë nisma e paketa të rëndësishme rreth mënjanimit të krizës ekonomike që mund të shkaktojë virusi.
Qeveria gjermane ka miratuar paketën më të madhe të ndihmës ekonomike të Gjermanisë, me vlerë 550 miliardë euro për kompanitë e ndryshme, duke iu ofruar atyre kredi për të mbajtur bizneset e tyre hapur.
Kryeministri italian Giuseppe Conte, ditën e djeshme ka miratuar dekretin ‘Cura Italia’ për emergjencën e Coronavirusit, duke ofruar 25 miliardë euro për familjet dhe bizneset.
Ditën e sotme Britania e Madhe parashikoi planin e saj, që parashikon: 1 miliardë paundë ndihmë direkte për familjet në nevojë që shpërndahet menjëherë nga Këshillat Vendore; 3 muaj shtyje të pagesës së kredisë; 330 miliardë paundë para në treg për të ndihmuar biznesin; 25 mijë paundë ‘cash’ për çdo biznes të vogël (pub, bar, dyqan i vogël) së bashku me përjashtim 1 vit nga taksat; një paketë mbështetëse e mundshme posaçërisht për linjat ajrore dhe aeroportet; ndihmë direkt në para për këdo që humb punën në rreth 90 paund në javë.
Mesazhi i Ramës:
U THA U BË!SAPO E FIRMOSA PO JU’A ÇOJ PËRPARA SE SA TË PROTOKOLLOHET PAS PAK MINUTASH, TË GJITHË ATYRE QË KANË NJË BIZNES DHE JANË NË HALL ME BANKAT PËR SHKAK TË LUFTËS
JU LUTEM TË GJITHËVE MIQ, KINI BESIM DHE BËNI DURIM
I LOVE YOU
https://www.facebook.com/edirama.al/posts/10157535745901523
URDHRAT NË DOKUEMT
Të shtyhet afati i pagimit të kësteve të kredive për biznese dhe individë deri në datën 31.05.2020, për të gjithë ata kredimarrë, të cilët janë përballuar me vështirësi në këtë periudhë të COVID-19. Kredimarrësit duhet të komunikojnë me kredidhënësit (banka institucione financiare jobanka apo me shoqëritë e kursim-kredive) duke u argumentuar këtyre të fundit arsyet mbi nevojat e tyre për shtyrje të pagimit të kësteve. Insticitucionet e kreditimit do të bëjnë bëjnë procesimin e çdo kërkese të paraqitur pranë tyre brenda 3 ditëve nga data e marrjes së kërkesës. Me zbatimin e këtij urdhri ngarkohen të gjitha institucionet e kreditimit të licensuara nga Banka e Shqipërisë.
Bilanci i COVID-19 në Shqipëri ka shkuar në 55 të prekur, mes tyre një viktimë. 9 prej të infektuarëve janë mjekë dhe infermierë, një nga Spitali i Durrësit dhe të tjerët nga spitali “Shefqet Ndroqi”. Vatra e të infektuarve është zgjeruar në Tiranë, Rrogozhinë, Elbasan, Durrës, Lushnje dhe Fier. Jeta në vend është paralizuar thuajse totalisht, nuk ka transport publik, është ndaluar lëvizja me makinë apo me këmbë, si dhe shumë vende punë janë mbyllur. Në shërbim të shtetit do të jenë edhe spitalet private gjatë periudhës së emergjencës dhe kush nuk bindet do ketë gjobë deri në 5 milionë Lekë. E vetmja këshillë e përbashkët e institucioneve dhe mjekëve është që qytetarët të qendrojnë në shtëpi dhe të kenë sa më pak kontakte me të tjerët.
