Më herët mbrëmjen e sotme u përhap me shpejtësi lajmi se katër pacientë nga Skrapari dhe Berati janë nisur drejt QSUT-së Tiranë mbrëmjen e sotme sepse kanë shfaqur simptoma, si temperaturë të lartë dhe bllokim në frymëmarrje.
Sipas informacioneve paraprake, u tha se bëhej fjalë për një çift nga Skrapari, 45 dhe 47 vjeç, si dhe fqinjën e tyre, një 22-vjeçare që kishte disa ditë që ishte kthyer nga Italia.
Ndërsa personi i katërt ishte një pacient i shtruar në Spitalin Rajonal të Beratit dhe ishte nisur drejt QSUT, pasi kishte shfaqur komplikacione.
Mirëpo, e vërteta duket ndryshe nga sa është paraqitur fillimisht.
Mësohet se 22-vjeçarja, e përfolur fillimisht, kishte disa ditë që ishte kthyer nga Rimni i Italisë dhe pasi kishte patur temperaturë ishte nisur më të fejuarin e saj drejt Tiranës.
Në një lidhje live në emisionin “Open”, pacientët thanë se nuk ishte i vërtetë lajmi që pak më parë u publikua në media për ardhjen e katër pacientëve në QSUT.
Ata treguan se doktoresha e në Spitalin e Skraparit i ka këshilluar të të bëjë analizën, pasi i ka parë që ka temepraturë dhe kështu, çifti u nis drejt Tiranës me makinën e tyre personale dhe nuk është e vërtetë se kanë prekur edhe fqinjët.
“Kam ardhur para një gjysmë ore se kisha temperaturë. Dyshojnë se kemi koronavirus. Qëndroja në Rimini në Itali. Një javë kemi qenë në Tiranë dhe sot në mëngjes u nismë për në Skrapar. Më dërgoi doktoresah sepse më pa temperaturën. Kam shumë respekt për doktoreshën dhe kam ardhur për merak. Nuk është e vërtetë që kanë qenë fqinjët me ne. nuk jemi as 48 vjeç. Unë jam 22 vjeç,“- tha ai.
Ndërsa e fejuara, 22-vjeçarja tha: “Më shkon temperatura 38 e gjysmë, 39. S’kam problem me frymëmarrjen pork am pak kollë. Frymëmarrjen e kam shumë mirë. Akoma s’na kanë marrë mostrat. Kemi 10 minuta që presim. Shkuam tek Urgjenca dhe erdhëm këtu. Erdhëm me makinën tonë”.
Ndërkohë, në atë moment ka mbërritur edhe një ambulancë me një pacient, për të cilin nuk ka akoma informacion, por dyshohet se mund të ketë simptomat e Coronavirusit.
“Mund të kemi një tjetër rast. Sapo erdhi një ambulancë me burrë të moshës së tretë. Mund të them që është rreth moshës 60 vjeç dhe nuk dihet nga cili qytet ka ardhur. Ambulanca është futur menjëherë në zonën e sigurisë, tani duhet të presim një konfirmim nga mjekët dhe autoritet”- tha gazetarja për ‘Open’.
Në vendin tonë janë shënuar dy rastet e para, një 28-vjeçar dhe babai i tij 54-vjeçar, që sollën marrjen e një sërë masash, ku Ministria e Arsimit ka pezulluar procesin mësimor për dy javë, si dhe janë anuluar të gjitha aktivitetet publike deri më 3 prill.
Ndërkohë, alarmante është bërë fakti se i ati i 28-vjeçarit ka marrë pjesë edhe në një ceremoni mortore, ku ka takuar një pjesë të mirë të personave të pranishëm, rreth 150 persona.
Duke u nisur nga ky kontakt, mendohet se edhe personat që ka takuar i infektuari mund të jenë infektuar, por nuk është bërë asgjë e ditur në lidhje me karantimin e këtyre personave.
Po ashtu, e ftuar në emisionin ‘Open’ drejtoresha departamentit të sëmundjeve infektive në ISHP, Silva Bino , ka konfirmuar lajmin se motra e 28-vjeçarit është nxënëse e një shkolle jo-publike në Tiranë.
Ajo ka patur kontakte me një numër të konsiderueshëm nxënësish, por karantinimi i tyre nuk është bërë ende.
Zbardhen detajet, motra e ‘pacientit zero’ shkoi për ditë me radhë në shkollën jo-publike në Tiranë
