Para pak ditësh humbi jetën nga COVID-19 dhe sorollatja nga njëri spital në tjetrin duke mos marrë ndihmën e nevojshme mjekësore 53-vjeçari Lutfi Çekirri nga Ndroqi.
Në lidhje me këtë ngjarje Ministria e Shëndetësisë ka ngritur grupe pune për hetimin e dy spitaleve në Tiranë, ku i moshuari ka kërkuar ndihmë mjekësore.
“Ministria e Shendetesise dhe Mbrojtjes Sociale ka ngritur një grup pune për të verifikuar procedurat e ndjekura në strukturat spitalore për pacientin me inicialet L.Ç, 53 vjeç, që ndërroi jetë në QSUT. Duke i shprehur ngushëllimet familjarëve, Ministria e Shëndetesise siguron se do të kryhet hetimi i plotë administrativ për procedurat e ndjekura nga strukturat spitalore. Ministria e Shëndetësisë dhe Mbrojtjes Sociale siguron qytetarët se shërbimi mjekësor është në gatishmëri për të ofruar jo vetëm urgjencat 24/7, por të gjitha shërbimet e nevojshme për qytetarët në të gjitha nivelet e kujdesit mjekësor”, thuhet në njoftimin zyrtar të Ministrisë së Shëndetësisë.
Ndërkohë para disa ditësh 53 vjeçari bëri një denoncim në media se nuk po merrte mjekimin e duhur në spitalet ku trajtohen pacientët e infektuar.
“Mbrëmë ishim në urgjencë dhe na kanë sjellë këtu për stomakun. Këtij i thotë shko tek infektivi, tjetri thotë s’je për këtu. Kemi qenë mbrëmë në Urgjencë, nga këtu shkuam në Laprakë. Atje më dhanë qetësues e më thanë duhet të shkosh të vizitohesh për stomakun. Tani nuk na japin përgjigje, një thotë shko atje. Jam me veshka, me ulçerë në stomak, tensionin e kam të ulët”, tha Çekirri në denoncimin e tij për mediat.
Sipas deklaratës së gruas së tij, ai kishte nevojë që të shtrohej në mënyrë urgjente në spital.
