Ditën e djeshme kreu i PD publikoi një video të titulluar “Po të dëgjoj”.
Në këtë video ai shfaqej duke ecur dhe takonte qytetarët e Tiranës.
Ajo çka tërhoqi vëmendje në gjithë këtë histori ishte prania e Brenton Kotorrit krah Bashës.
Kotorri është auditues i parë në Kontrollin e Lartë të Shtetit.
Kjo bëri bujë në media, pasi punonjësit e këtij institucioni nuk duhet të kenë angazhime politike.
Së fundmi, KLSH ka dhënë një deklaratë për media, duke u shprehur se është një organ i depolitizuar dhe i departizua.
Po ashtu, rikujton se punonjësit që ushtrojnë funksione audituese të KLSH-së nuk lejohet të marrin një mandat politik, as të jenë anëtarë aktivë të ndonjë organizate apo partie politike si dhe nuk duhet të marrin pjesë në veprimtari politike ose me karakter tregtar.
KLSH bëri me dije se Kotorri kishte paraqitur dorëheqjen dhe që prej ditës së sotme nuk ishte më pjesë e institucionit.
Kështu, veprimin e tij KLSH e quan një shkelje të rregullores së institucionit.
Ndonëse ai kishte paraqitur dorëheqjen, nuk duhej të merrte angazhine të këtij lloj pa u pranuar dorëheqja nga kreu i KLSH.
Sqarimi i KLSH-së:
Në disa media online dhe në shtypin e shkruar të ditës së sotme ka qarkulluar një lajm lidhur me praninë e një audituesi të KLSH-së, B.K., në krah të liderit të opozitës.
Dëshirojmë të informojmë publikun që në mbështetje të Ligjit “Për organizimin dhe funksionim e Kontrollit të Lartë të Shtetit”, neni 4 “… KLSH është një organ i depolitizuar dhe i departizuar”, si dhe në Kodin e Etikës të Institucionit, neni 14.1 :
“Punonjësit që ushtrojnë funksione audituese të KLSH-së nuk lejohet të marrin një mandat politik, as të jenë anëtarë aktivë të ndonjë organizate apo partie politike si dhe nuk duhet të marrin pjesë në veprimtari politike ose me karakter tregtar. Përjashtohen nga kufizimi mësim dhënia, botimet dhe veprimtaritë kulturore apo sportive me kusht që këto aktivitete të mos dëmtojnë dinjitetin e institucionit dhe të mos cënojnë paanshmërinë dhe pavarësinë e tij”, reagimi i medias është i drejtë sepse audituesi B.K. duhet të kishte pritur që dorëheqja e tij të ishte konfirmuar nga Kryetari i KLSH-së, përpara se z.B.K. të ndërmerrte angazhime të këtij lloji.
Informojmë gjithashtu se dorëheqja e z. B.K. u pranua sapo u paraqit në datën 04/02/2020 dhe mbështetur në Vendimin nr. 171/2, datë 04/02/2020, z.B.K. nuk është më punonjës i KLSH-së.
