Kryebashkiaku i Kolonjës, Erion Isai, është marrë i pandehur nga Prokuroria e Posaçme kundër Krimit të Organizuar dhe Korrupsionit (SPAK), në kuadër të hetimeve për shkelje të tenderave dhe falsifikim të projekteve publike. Hetimi, i drejtuar nga prokurori Dritan Prençi, ka në fokus dy procedura të rëndësishme: ndërtimin e një ujësjellësi dhe ndërtimin e rrugës Korçë-Ersekë, ku dyshohet se janë kryer manipulime për përfitime të paligjshme.
Përveç Isait, SPAK ka marrë në procedim edhe shtatë persona të tjerë, mes tyre administratorë shoqërish të përfshira në projektet e infrastrukturës. Hetimet kanë treguar se shumë nga tenderat e shpallur nga Bashkia Kolonjë kanë qenë të parapërgatitur dhe të paracaktuar, duke çuar në përfitime të paligjshme dhe shpërdorim të fondeve publike.
Në dosjen hetimore janë zbardhur komunikime përmes WhatsApp-it mes Isait dhe Entela Çanos, administratores së kompanisë “A & E Engineering”, e cila kishte marrë pjesë në projektin e rrugës Korçë-Ersekë, Loti II. Mesazhet zbulojnë diskutime mbi manipulimin e parametrave teknikë dhe falsifikimin e projekteve.
Disa nga komunikimet e publikuara:
- 10:05, Erion Isai: “Miremengjes, shifi pak këto: Po 110 max ose 90 i jep zgjidhje thuj enteles. Vetem rrjeti jashtëm deri depo fi 250 ne 20 bar eshte 18755 ml X 6793 leke = 127402715 pa tvsh kurse pesari fi 200 me gjatësi 1880 X 4747 leke = 8924360 leke.”
- 10:06, Entela Çano: “Miremengjes, ok. Mi dërgo. Ok te njëjtën gje po bejem edhe ne, reduktim parametrash.”
- 14:57, Erion Isai: “Me duhet lista me emrat e fshatarëve dhe vendet për çdo fshat vella. Një zjarri te lutesh…”
- 21:28, Erion Isai: “Pls… zjarrrr… Se neser duhet me i printu t’i vulos ktu te Une Te premte mengjes heret. Duhen dorezu.”
- 21:29, Entela Çano: “Do bëj më të mirën e mundshme… mendoj që do t’i jem korrekte… por jam sforcuar shumë për të kapur vlerën…”
- 21:30, Erion Isai: “Ishte teeepeeeeee e larte.”
Nga këto komunikime del qartë presioni për përgatitjen dhe dorëzimin e dokumenteve të manipuluara në kohë, si dhe diskutime mbi reduktimin e parametrave të projekteve për të përshtatur vlerat financiare.
SPAK vijon hetimet për të zbardhur rolin e plotë të kryebashkiakut dhe personave të tjerë të përfshirë. Erion Isai dhe të pandehurit e tjerë përballen me akuza për shpërdorim detyre, falsifikim dokumentesh dhe shkelje të ligjit mbi tenderat publikë.
