Gjykata e Fierit ka vendosur të lërë në burg Aleksandër Zhapajn, i cili u plagos me armë zjarri në urgjencën e spitalit 4 ditë më parë.
Ai është njohur me masën e sigurisë nga spitali i Traumës, për shkak se u detyrua të transferohej për një ndërhyrje më të specializuar, shkruan “Shqiptarja.com”.
Kujtojmë këtu se 4 persona mbetën të plagosur, si pasojë e një sherri në Levan të Fierit, 4 ditë më parë.
Aleksandër Zhapaj kishte shkuar në spital për të shoqëruar dy djemtë e tij të plagosur, ku u qëllua me armë zjarri nga Daniel Braçe.
Ky i fundit i mori armën një punonjësi të policisë.
Personat e tjerë që mbetën të plagosur dhe po marrin mjekimin e nevojshëm, janë Gentian dhe Aldi Zhapaj, Erlind Muçaj dhe Klajdi Lamaj.
