Pas aksionit të pasdites së sotme, ku ranë në pranga katër persona të dyshuar për trafik drogash të forta drejt Europës, policia e Tiranës del në komunikatë zyrtare.
Në të theksohet se arrestimi është bërë falë bashkëpunimit me qytetarët, ndërkohë që të katër të dyshuarit janë zënë në befasi pasi kanë tentuar të zhdukin sendet e paligjshme sapo kanë pikasur policinë.
Pas informacioneve të siguruara në rrugë operative për disa persona që dispononin armë e drogë, Seksioni i Forcës së Posaçme të Operacioneve Speciale dhe Kërkimit në bashkëpunim me Seksionin për Hetimin e Krimeve të Rënda ndaj Jetës, ka arrestuar shtetasit Leonard Duka, 33 vjeç, banues në Tiranë; Dritan Agaj, 38 vjeç, banues në Tiranë; Oltion Loga, 38 vjeç, banues në Tiranë; Elvis Gaçaj, 44 vjeç, banues në Tiranë.
Policia sekuestroi në cilësinë e provës materiale: Një mjet të blinduar; Një armë zjarri pistoletë me krehër me fishekë; 46 fishekë luftarak, si dhe doza me lëndë narkotike kanabis.
Sipas Kodit Penal nenet 283 dhe 278/25, çdo material do t’i kalojë Prokurorisë së Rrethit Gjyqësor Tiranë në ngarkim të shtetasve të lartpërmendur për veprat penale të “Prodhimit dhe shitjes së lëndëve narkotike” dhe “Prodhim dhe mbajtja pa leje e armëve e municionit luftarak e kryer në bashkëpunim.”
