Një aksident tragjik ndodhi mëngjesin e djeshëm në Treviso të Italisë. Dy shqiptarë kanë humbur jetën si pasojë e këtij aksidenti, të cilët po udhëtonin me një mjet tip “Golf”.
Sipas mediave italiane, mjeti i dy të rinjve, humbi kontrollin dhe doli nga rruga. Dy viktimat janë Dorian Myftaraj 24 vjeç dhe 35 vjeçari Rruzhdi Karreci.
Përplasja ka qenë shumë e fortë. Fillimisht mjeti ka dalë nga rruga dhe është përplasur me murin e një kantieri ndërtimi.
Dy shqiptarët nuk kishin vendosur as rripin e sigurimit, por ende nuk janë zbardhur shkaqet e vërteta të ngjarjes së rëndë, nga e cila humbën jetën dy shqiptarë. Kalimtarët e rastit e kanë parë makinën dhe kanë njoftuar menjëherë policinë.
Edhe pse ambulanca ka mbërritur shpejt në vendngjarje, shqiptarët nuk kanë mundur dot t’u mbijetojnë plagëve të marra.
Mediat kanë shkruar gjithashtu se 35-vjeçari Karreci, ka qenë më parë i arrestuar nga drejtësia italiane, pasi ishte kapur me kokainë.
