Ka reaguar avokati i 12 të arrestuarëve të përfshirë në një skemë huaje jashtë sistemit bankar, pas dhënies së masës së sigurisë nga Gjykata e Shkodrës, e cila u dha masën “arrest me burg”.
Avokati Anton Kosteri ka deklaruar se arrestimi është i paligjshëm, pasi nuk ka asnjë provë që dokumenton dhënien e fajdeve nga ana e klientëve të tij apo kërcënimin ndaj ish-prefektit Radovani i cili është edhe denoncuesi i kësaj skeme.
Kosteri e quan operacionin një flluskë sapuni e cila po përdoret për të bërë ‘show’.
“Deri më tani nuk ka asnjë provë që provon kërcënime apo presione për dy djemtë e ish-prefektit Paulin Radovani apo vetë ish-prefektin. Denoncuesi është ish-prefekti dhe deri më tani nuk rezulton asgjë. Do apelojme dhe do kërkojmë që të pushohet çështja ndaj të arrestuarve”- u shpreh ai.
Kujtojmë se në skemën e zbuluar rreth një javë më parë në kuadër të hetimeve të bëra nga Prokuroria dhe Policia e Shkodrës, përmes operacionit ‘Maranaj’, ishin të përfshirë ish-kancelarë gjykate, policë dhe noterë, dhe ish-drejtori i LSI-së i Patentave në Shkodër.
Skema e fajdexhinjve ishte denoncuar nga ish-prefekti i Shkodrës, Paulin Radovani, djemtë e të cilit kishin marrë para hua nga ky grup i cili funksiononte në mënyrë të strukturuar.
