SPAK-u ka dalë kundër arrestimit të gjashtë oficerëve të Policisë Kufitare në Durrës. Një vit më parë, ata u panë si të korruptuar, kur po ishin në krye të detyrës në terminalin e pasagjerëve të portit.
Dyshimet që kishte policia se ata ishin të korruptuar u mbyllën nga SPAK, teksa konsiderohen si të paprovuara këto akuza.
Por edhe pse policia një vit më parë pasi ndërhyri në kabinat e 6 oficerëve u gjeti atyre në xhepa kartmonedha në valutë të huaj, sipas dosjes, SPAK këmbëngul se oficerët e policisë, Durim Xeka, Arjan Gjyzeli, Dorina Doganaj, Gezim Caca, Juljana Kurraj, edhe pse i posedonin keto vlera monetare, kjo nuk ishte një e dhënë që i implikon në marrje rryshfeti.
Oficerja e gjashtë, Greta Batusha edhe ajo e hetuar dhe të cilës iu gjetën 50 euro brenda pasaportës së një qytetari që po përpunonte, po ashtu konsiderohet e proceduar pa provë. SPAK shton se dyshimi ndaj polices nuk formësohet me asnjë ngjarje korruptive apo abuzimi me detyrën. Në vendimin e pushimit radhiten edhe dëshmitë e oficerëve të hetuar. Oficeri Gjyzeli që kishte në xhepa 300 euro, i cili pretendon se do ia jepte një mikut të tij që udhëtonte drejt Italisë për t’i blerë ilaçet e të birit. Edhe efektivi Xeka që kishte në xhep 100 euro këmbëngul se i mbante në kuletë, pasi do të udhëtonte në Itali për t’u kuruar, ndërsa Caca insiston se shumat e konsiderueshme i duheshin për të blerë një lavatriçe.
Policja Doganaj i thotë SPAK-ut se shumën prej 150 euro ia kishte dhënë i vellai pasi kishte marrë rrogën. E pyetur nga SPAK, policja Kurraj që iu zbuluan 830 euro në kuletë tregon se ditën e arrestimit te saj, partneri dhe i biri do të udhëtonin drejt Italisë për shkaqe personale. SPAK thotë se këto dëshmi provohen nga një sërë veprimesh të tjera ku përfshihen biletat e udhëtimit, faturat dhe bisedat në telefon.
/Burimi: Top Channel/GazetaReforma.com/
