Dy shtetas shqiptarë janë ekstraduar në Shqipëri nga Gjermania dhe Italia, në kuadër të hetimeve të zhvilluara nga autoritetet shqiptare.
Njëri prej tyre është Ilia Ndoka, 50 vjeç, i cili u arrestua në Itali në maj të vitit 2024 dhe u ekstradua së fundmi drejt Tiranës. Ai ishte në kërkim në bazë të një urdhër-arresti të lëshuar nga SPAK, si pjesë e operacionit “Revanshi”.
Sipas Policisë së Shtetit, Ilia Ndoka dyshohet se ka ndihmuar kushëririn e tij, Arben Ndoka, duke i ofruar mbështetje financiare dhe informacion për të identifikuar dhe hakmarrë ndaj autorëve të vrasjes së vëllait të Arbenit, Aleksandër Ndoka.
Hetimet tregojnë se Ilia Ndoka ka pasur kontakte dhe bashkëpunim me disa nga grupet më të njohura kriminale në vend, përfshirë “Avdylajt” e Shijakut, grupin e Ervis Martinajt, atë të Emiljano Shullazit, si dhe individë të tjerë të përfshirë në aktivitete të paligjshme.
