Gjykata e Posaçme kundër Korrupsionit dhe Krimit të Organizuar ka vendosur të lërë në fuqi masën e sigurisë “arrest në burg” për Loran Dushën, ish-administratorin e inceneratorit të Fierit.
Masa ishte dhënë më herët në mungesë, ndërsa Dusha u ekstradua nga Zimbabve dy ditë më parë, pas një periudhe të gjatë në arrati.
Dusha, 42 vjeç, nuk ishte i pranishëm në sallën e gjyqit për shkak të problemeve shëndetësore. Ai akuzohet nga SPAK për “shpërdorim detyre”, “korrupsion aktiv të funksionarëve të lartë” dhe “pastrim parash”, në kuadër të hetimeve për aferën e inceneratorëve, një nga çështjet më të mëdha të korrupsionit të hetuar ndonjëherë në Shqipëri.
Sipas SPAK, Dusha, në cilësinë e administratorit të një kompanie private, ka përfituar në mënyrë të paligjshme fonde publike përmes faturave dhe pagesave fiktive, duke raportuar punë dhe shërbime që nuk janë kryer.
Policia sqaroi se operacioni për ekstradimin e tij është mbajtur sekret dhe u realizua në bashkëpunim me partnerët ndërkombëtarë.
Në vitin 2022, GJKKO kishte caktuar ndaj tij masën “arrest në burg” dhe e kishte shpallur në kërkim ndërkombëtar. Pas mbërritjes në Shqipëri, ai u dorëzua Drejtorisë së Përgjithshme të Burgjeve.
Në lidhje me dosjen e inceneratorit të Fierit, Gjykata e Posaçme kishte shpallur më herët vendimet për një numër të madh të pandehurish, përfshirë ish-ministrin Lefter Koka, ish-deputetin Alqi Bllako dhe vetë Loran Dushën.
Fillimisht, Dusha u dënua me 7 vite burg, por për shkak të gjykimit të shkurtuar, dënimi iu reduktua në 4 vite e 8 muaj. Megjithatë, Apeli i GJKKO vendosi rikthimin e çështjes për rigjykim dhe procesi ndaj tij është ende në zhvillim.
Hetimet për inceneratorin e Fierit u mbyllën në dhjetor të vitit 2022. SPAK akuzon se përmes një skeme mashtrimi janë paguar mbi 4 milionë euro për punë të pakryera, duke shkaktuar një dëm prej 60 milionë lekësh në buxhetin e shtetit.
