Gjykata e Tiranës do të zhvillojë sot seancën për masën e sigurisë për të arrestuarit në protestën e të dielës pas shembjes së Teatrit Kombëtar.
Të ndaluarit janë: Ermal Shkalla; Sabri Mekollari; Xhevdet Nela; Pjetër Hasaj; Endrit Mërtiri; Boiken Abazi; Sokol Ndoj, Romeo Lila, Burim Tafilica dhe Edjon Xhoxhaj, të gjithë të arrestuar të dielën pas përplasjes me Policinë.
Nga ana tjetër, Aleanca për Mbrojtjen e Teatrit ka bërë thirrje që qytetarët të dalin në solidaritet të të ndaluarve tek dera e gjykatës dhe kësaj thirrje u janë përgjigjur dhjetara qytetarë, të cilët mbajnë në duar pankarta dhe bëjnë thirrje “Lironi aktivistët”.
Ditën e sotme rikthehen protestat, pasi në orën 17:30, Aleanca për Mbrojtjen e Teatrit së bashku me opozitën do të zhvillojnë protestën e radhës, kundër shembjes së Teatrit Kombëtar.
Pas një dite ‘pauzë’, kjo në respekt të besimtarëve mysliman pasi e marta përkonte me natën e Kadrit, Aleanca do të zbresë në Bulevardin ‘Dëshmorët e Kombit’ përballë Ministrisë së Brendshme.
Pritet që në protestë të marin pjesë qytetarë, aktivistë dhe aktorë, të cilët hedhin akuza ndaj Erion Veliajt dhe Edi Ramës për shembjen e kësaj godine.
Krah tyre, ashtu si kurse edhe në protestën e kaluar, do të jetë edhe opozita, me kryedemokratin Lulzim Basha dhe kryetaren e LSI-së, Monika Kryemadhi.
Mëngjesin e 17 majit me vendim të Këshillit Bashkiak të Tiranës, u shemb godina e Teatrit Kombëtar, vendim ky i pasur me dy protesta të njëpashnjëshme, të cilat është përdorur edhe dhuna policore ndaj qytetarëve.
Opozita ka mbështetur protestat dhe ka thënë se tashmë do të përkrah çdo tubim të qytetarëve, pasi sipas tyre është kaluar vija e kuqe, teksa pritet që protesta e radhës të zhvillohet nesër në orën 17:30.
Pas shembjes, kryebashkiaku Erion Veliaj kërkoi bashkëpunim me artistët, ndërsa kryeministri Edi Rama premton se godina e re do të jetë moderne dhe do plotësojë të gjithë kërkesat e aktorëve.
Sakaq, nuk kanë munguar edhe reagimet nga ndërkombëtarët.
BE iu bëri thirrje palëve të tregojnë kufizim dhe të shmangin përshkallëzimin e situatës, ndërsa amabasada britanike në Tiranë tha se dhuna minon demokracinë, edhe ambasadori gjerman është i të njëjtit mendim.
