Avokatët e mjekut Edvin Prifti kanë dorëzuar në Apelin e Gjykatës së Posaçme kërkesën për ndryshimin e masës së sigurisë ndaj tij.
Avokatët kërkojnë masë më të butë se ajo e arrestit në burg, ndërsa burime nga SPAK thonë se po hetohen 3 denoncime të reja për mjekun.
Ankim pritet të dorëzojnë edhe avokatët e gjyqtares së Krujës, Enkelida Hoxha, avokatit Aldo Tabaku dhe të ndaluarve të tjerë.
Mjeku Prifti u vu në pranga pas përgjimeve ku sekretarja e Gjykatës së Krujës, deklaronte se do ti jepte një shumë eurosh, në mënyrë që ti bënte operacion pa radhë nënën e saj në ambientet e QSUT.
Pas kontrolleve atij iu gjet një shumë e madhe parash në banesë dhe në zyrë, çka i shtoi dhe akuzën e pastrimit të parave, ku më pas GJKKO vendosi dhe masën e arrestit ndaj tij.
Vetë Prifti tha se e priste një vendim të tillë, pasi sipas tij ishte kryeministri Edi Rama ai që njoftoi arrestimin, shumë më para se të shprehej vetë Gjykata.
“Deklaratat e kryeministrit duhet t’i komentojë i gjithë publiku. Në rast se nuk ka qenë në dijeni, por thjesht është lapsus, gjë që do dëshiroja ta besoja, pasi mendoj se mund të ketë qenë lapsus, në të kundërt mund të ketë një urdhër që ai iu ka dhënë prokurorisë dhe drejtësisë shqiptare. Nuk di ta them nëse është presion, urdhër apo lapsus, por kjo gjë do të vërtetohet tani, sapo të hyj në gjykatë.”, u shpreh mjeku.
Po ashtu, mësohet se në SPAK kanë mbërritur edhe 3 denoncime të reja për mjekun, të cilat po hetohen.
