Anëtarët e Këshillit Politik për Reformën Zgjedhore do të mblidhen sërish sot në orën 19:30 për arritjen e marrëveshjes përfundimtare, me kërkesë të zyrës së OSBE-së në Tiranë.
“Topi” siç ka deklaruar edhe ambasadorja amerikane është në fushën e Lulzim Bashës dhe tashmë pritet qëndrimi i opozitës.
I mandatuari i LSI-së në Këshillin Politik, Petrit Vasili po zhvillon në këto momente një takim me kreun e PD-së, Lulzim Basha dhe siç raporton “BalkanWeb” në takim është edhe bashkëkryetari i Komisionit për Reformën Zgjedhore, Oerd Bylykbashi.
Palët janë në prag të arritjes së marreveshjes së shumëpritur për Reformën Zgjedhore, teksa në selinë blu ka shkuar edhe kryetarja e LSI-së, Monika Kryemadhi.
Pas deklaratës së Kim, se topi ndodhej në anën e Bashës, ky i fundit nuk ka ndenjur duarkryq por ka vijuar takimet intensive me aleatët, teksa pranoi publikisht se në parim binte dakord me marrëveshjen por kishte një pikë që kërkonte rishikim, administrimi i qendrave të votimit dhe komisioneve zonale.
Opozita propozoi nga një komisioner zgjedhor, që të kishte kompetencën dhe përgjegjësinë individuale dhe me anëtarë pa të drejta nga partitë.
Ky ishte propozimi i opozitës, ndërsa negociata e amerikanëve solli variantin më të preferuar nga maxhoranca, që sipas tyre përputhet edhe me rekomandimet e OSBE-së.
Në komisione do të jenë 3 anëtarë nga administrate publike, 2 vëzhguesë nga maxhoranca dhe 2 nga opozita.
