Zbulohet fotoja e Bujar Shegës, 52-vjeçarit të ekstraduar nga Milano, i akuzuar për trafikim narkotikësh dhe pastrim parash në kuadër të një grupi të strukturuar kriminal.
Shega, i njohur si “truri financiar” i organizatës kriminale të Suel Çelës, është administrator i dy kompanive, Viola Green dhe Wonder Green. Kompanitë e tij kanë fituar tendera për pastrimin e disa qyteteve, dhe ai njihet për lidhje të forta me politikën.
Nëpërmjet bizneseve të tij, dyshohet se Shega ka pastruar para për grupe kriminale të ndryshme, përfshirë një grup të fuqishëm me bazë në Dubai që ka investuar në pasuri të paluajtshme në Tiranë.
Suel Çela, një emër i njohur në botën e krimit dhe i shpallur në kërkim në kuadër të operacionit “Plumbi i Artë”, ka pësuar goditje të forta. Autoritetet kanë kryer kontrolle në bazat dhe bizneset e tij në Elbasan, duke sekuestruar dokumente dhe prova të tjera.
Hetimi dhe goditja e kësaj organizate kriminale erdhën pas zbërthimit të komunikimeve në sistemin Sky ECC dhe provave të tjera që u morën nga autoritetet belge, të cilat kanë hetuar prej vitesh trafikun e kokainës dhe pastrimin e parave.
