Donald Trump, 78 vjeç, presidenti më i vjetër i zgjedhur ndonjëherë në historinë e SHBA-ve, ka deklaruar se është në “gjendje të shkëlqyer” pas kontrollit të tij vjetor mjekësor.
Gjatë një bisede me gazetarët në bordin e Air Force One, gjatë udhëtimit nga Uashingtoni drejt Floridës, Trump tha:
“Në përgjithësi, u ndjeva shumë mirë. Zemra në rregull, shpirt shumë i mirë.”
Kontrolli u krye në Spitalin Ushtarak Walter Reed dhe përfshiu edhe një test njohës, të cilin ai tha se e bëri për të treguar diferencën me Joe Biden, duke rikujtuar sfidën që i ka bërë rivalit të tij për t’iu nënshtruar një vlerësimi të tillë mendor gjatë fushatës.
“Nuk di çfarë t’ju them, përveç se i kam marrë të gjitha përgjigjet drejt,” u shpreh Trump.
Edhe pse nuk konsumon alkool apo duhan, Trump nuk e ka fshehur dobësinë për pijet joalkoolike dhe ushqimin e shpejtë.
Ai është kritikuar shpesh për mungesë transparence në lidhje me shëndetin, veçanërisht kur u shtrua në spital për disa ditë nga Covid-19, në muajt e fundit të mandatit të parë.
Në vitin 2018, ish-mjeku personal Harold Bornstein deklaroi se Trump i kishte diktuar atij në dhjetor 2015 një opinion mjekësor që e përshkruante shëndetin e tij si “të shkëlqyer.”
