Një ngjarje tronditëse ka ndodhur sot në Prishtinë ku një 41-vjeçare ka humbur jetës pasi u dhunua brutalisht nga bashkëshorti i saj. Gruaja e identifikuar me inciale M.Zh., nga Gushterica e Poshtme e Komunës së Graçanicës ndërroi jetë në Qendrën Spitalore Klinike në Prishtinë, si pasojë e plagëve të rënda që kishte marrë në kokë dhe në trup.
Lajmi është konfirmuar edhe nga drejtori i Qendrës Emergjente në Prishtinë, Naser Syla, i cili thotë se gruaja kishte hemorragji në tru për shkak të dëmtimeve që kishte pësuar si pasojë e dhunës. 41-vjeçarja përfundoi në spital në gjendje të rëndë shëndetësore mbrëmjen e 31 korrikut. Bashkëshorti i saj, D.Zh., është arrestuar dhe po mbahet në paraburgim.
Kujtojmë se gjatë muajit prill, dy gra u qëlluan nga burrat e tyre brenda pak ditësh në Kosovë. Presidentja e Kosovës Vjosa Osmani më pas u bëri thirrje institucioneve të sigurisë dhe drejtësisë, shoqërisë civile, qytetarëve, grave dhe burrave që të punojnë së bashku për të ndalur dhunën me bazë gjinore.
Nga viti 2010 deri në prill të vitit 2024, në Kosovë janë vrarë 57 gra. Në të shumtën e rasteve, autorë të vrasjeve kanë qenë bashkëshortët, pastaj baballarët dhe djemtë.
