Mëngjesin e sotëm një shpërthim i fuqishëm ka ndodhur në Sarandë.
Hotel “Bizanti”, një nga më të vjetrit në qytetin e Sarandës, në pronësi të biznesmenit Spiro Çabiri, është rrafshuar si pasojë e një shpërthimi me eksploziv.
Policia ka ngritur një grup hetimor teksa nga informacionet paraprake dyshohet se për hotelin, i cili nuk ishte funksional gjatë kësaj periudhe, por vetëm në sezonin veror mund të jetë hedhur në erë, mund të jenë përdorur disa kilogramë tritol. Sipas dëshmitarëve ka qenë një shpërthim i fuqishëm, e pandodhur në 30 vite, teksa nga shpërthimi janë dëmtuar biznese dhe ndërtesa të tjera. Vlen të theksohet se godina e synuar nga autorët e eksplozivit është pothuajse e rrënuar ndërsa ende nuk ka raporte për lëndime në njerëz.
Bëhet me dije se më parë, pronari ka pasur konflikte pronësie me ish-ortakët e tij për hotel “Bizant” si dhe për një piceri që gjendej në katin e parë. Prej vitit 2002, dy bashkëpronarët, S. Ç., dhe E. Dh., janë në një proces gjyqësor për pronësinë e këtij hoteli, njofton policia. Nuk dihet nëse shpërthimi ka lidhje me këto konflikt, por policia po i heton ato si pista kryesore.
Njoftimi i policisë:
Rreth orës 05:55, në lagjen nr.1, Sarandë, në një hotel dy-katësh i ndërtuar që prej vitit 1996, në pronësi të shtetasve S. Ç., dhe E. Dh., ka shpërthyer një sasi lënde, e dyshuar eksplozive, ku si pasojë ndërtesa është rrëzuar dhe janë shkaktuar dëmtime të fasadave të objekteve në afërsi të objektit të rrëzuar.
Nga shpërthimi nuk ka asnjë person të lënduar.
Shërbimet e policisë kanë shkuar menjëherë në vendngjarje dhe vijojnë kontrollet në zonë për kapjen e autorit/ve.
Menjëherë është ngritur një grupi i posaçëm hetimor me ekspertë më të mirë të DVP Vlorë dhe nga Departamenti i Policisë Kriminale dhe nën drejtimin e Prokurorisë vijon puna për zbardhjen e ngjarjes.
Nga të dhënat paraprake rezulton se prej vitit 2002, dy bashkëpronarët janë në një proces gjyqësor për pronësinë e këtij hoteli.
