Ditët e fundit lajmet mbi përfitimin e lirisë me kusht janë shtuar shumë dhe duket se është kthyer në një ‘trend’.
Vetëm para pak ditësh Gjykata e Elbasanit i bashkoi Dritan Dajtit dy dënime në një, duke e dënuar përfundimisht me 25 vite burgim.
Me bashkimin e dy vendimeve në një vendim përfundimtar, gjykata e Elbasanit sqaron se Dritan Dajtit i kanë mbetur për të vuajtur akoma burg dhe 3 mijë 917 ditë ose thënë ndryshe dhe 10 vjet e 8 muaj e 27 ditë. Me këtë përllogaritje që daton që nga periudha e 20 prillit 2001, duke futur këtu dhe uljet e dënimit me 90 ditë që Dritan Dajti do kërkojë në vitet në vijim, automatikisht këtij të dënuari për 6 vrasje, “Mbajtje pa lejë të armëve”, “Falsifikndokumentash” etj, ti hapet rruga për të kërkuar lirimin me kusht.
Ndërkohë që ditën e djeshme “i forti” i Vlorës në trazirat e ’97 Zani Caushi ka kërkuar lirinë me kusht në Gjykatën e Korçës. Myrteza Çaushi, i njohur ndryshe si Zani Çaushi, i dënuar me burgim të përjetshëm ka bërë kërkesë për të përfituar lirinë. Ish-kreu i bandës së “Çoles” kërkon që Gjykata të ndryshojë vendimin e marrë ndaj tij.
Por çfarë është përfitmi i lirisë me kusht dhe kush mund ta fitojë atë?
Përfitimi i lirisë me kusht është një e drejtë ligjore dhe se një i dënuar që vuan një dënim me burgim të përjetshëm mund të lirohet me kusht nëse ai ka vuajtur të paktën tridhjetë e pesë vjet burgim dhe nëse ka mbajtur sjellje shembullore dhe qëllimi i riedukimit të tij është arritur.
Lidhur me këtë temë ka folur për RTV Ora avokati Baftjar Rusi i cili sqaron gjithashtu edhe bazën ligjore që po shfrytezohet nga të dënuarit.
Rusi: Kodi Penal e parashikon një gjë të tillë, mos gabohem është neni 64 i Kodit Penal. Për të dënuarit me burgim të përjetshëm, në raste tepër të veçanta kur ai gjatë gjithë pjesës që ka vuajtur dënimin nuk duhet të ketë bërë asnjë shkelje.
Avokati pranoi se në shumë raste kjo dispozitë keqpërdoret nga gjyqtarë të caktuar të cilët perdorin standart të dyfishtë për të dënuarit e tjere që u kanë mbetur pak vite burg
Rusi: Do thoja që është shumë e papranueshme që një gjyqtar që merr guximin që liron të dënuarit me burgim të përjetshëm dhe nuk i jep atyre që kanë një dënim më të ulët.
Shqipëria nuk ështe e vetmja që e ka këtë praktikë. Ajo aplikohet edhe në vende të tjera.
Nëse një i dënuar me burgim të përjetshëm ka kryer 25 vite që ka qënë dënimi maksimal në kohën kur ka kryer veprën ose 35 vite pas ndryshimeve të bëra së fundi dhe ka treguar sjellje të mire gjatë kohës së qëndrimit në institucion atëhere atij i lind e drejta të kërkojë liri me kusht kerkesë që miratohet apo rrëzohet nga gjykata.Ndërsa për të dënuarit të cilët kanë dënime të tjera e drejta për përfitim të lirisë me kusht i lind pasi kanë kryer 3 të 4 e dënimit.
