Një ngjarje tragjike është shënuar ditën e sotme në Berat. Bëhet e ditur se një grua me inicialet K.XH, ka qenë duke drejtuar mjetin tip “Benz”, teksa ka humbur kontrollin dhe ka rënë në lumë. Ajo ka qenë duke udhëtuar së bashku me djalin e saj 6-vjeçar. Fatkeqësisht, të dy kanë humbur jetën si pasojë e aksidentit.
Ndërkohë që grupi hetimor ndodhet në vendngjarje dhe po heton shkaqet e ndodhjes së aksidentit.
“Rreth orës 14:00, në rrugën urbane “Antipatrea”, pranë vendit të quajtur “Ura e re”, shtetasja K. Xh., duke drejtuar mjetin tip “Benz” ka humbur kontrollin dhe ka rënë në lumë. Për pasojë kanë humbur jetën drejtuesja e mjetit dhe fëmija i saj rreth 6 vjeç. Grupi hetimor në vendngjarje po kryen veprimet për zbardhjen e shkaqeve të aksidentit”, thuhet në njoftimin e policisë së shtetit.
Vlen të përmendim se kohët e fundit është shënuar një shifër e lartë e aksidenteve rrugore, ku në pesëmujorin e parë të vitit 2022, numërohen 483 aksidente rrugore nga 547 aksidente, të ndodhura në të njëjtën periudhë të një viti më parë, duke u ulur me 11,7 %.
Sakaq, në muajin maj 2022 numërohen 106 aksidente rrugore nga 120 aksidente të ndodhura në muajin Maj 2021, duke u ulur me 11,7 %, krahasuar me të njëjtën periudhë të një viti më parë.
